በተለያዩ የኢትዮጵያ ከተሞች ሕዝባዊ እንቢተኝነቱ ዳግም አገረሸ

አባይ ሚዲያ ዜና
አቢሰሎም ፍሰሃ

በአብዛኛው የምዕራብ ኦሮሚያ አከባቢዎች እና በአምቦ፣ ጊንጪ፣ ጉደር፣ ግንደበረት፣ በኮቴና ኩታዬ የስራ ማቆም አድማ እየተደረገ መሆኑ ታውቋል።

ከአምቦ እስከ ነቀምት ሙሉ በሙሉ እንቢተኝነቱ ተጀምሮ ህዝቡ ሱቁን እና መንገድ በመዝጋት የህወሀት አገዛዝ ያብቃ ጥያቄ ማሰማቱ ታውቋል። በሰንዳፋ፣ በኬና ሽኖ በተሰኙ አከባቢዎችም ህዝባዊ ተቃውሞ በመደረግ ላይ መሆኑን የሚወጡ መረጃዎች ያመላክታሉ።

የህወሓት ስርዓት የሕዝብን ጥያቄዎች ባለመመለስ እና ስልጣኑን በኃይል በወታደራዊ እና በደህንነት ጨፍልቆ ለመግዛት እንደወሰነ ታውቋል። በዜጎች ላይ እየፈፀመ ያለው ኢሰብዓዊ ድርጊት ከጊዜ ወደ ጊዜ እየባሰበት በመምጣቱ ዜጎችን በመከፋፈል እና በመግደል ጊዜውን ለማራዘም በመወሰን በአባላቱ ላይ እርምጃ ለመውሰድ መወሰኑም ተሰምቷል።

አገር ወደ ጥፋት እያመራች ስለሆነ ከእኛ ጥቅም በላይ አገር ይበልጣል፤ ለግል እና ለተወሰነ ቡድን ጥቅም ብለን ያልተፈለገ ውሳኔ መወሰን የለብንም ያሉትን የራሱን ሰዎች ለማጥፋት ወስኖ ተግባራዊ ለማድረግ እየተንቀሳቀሰ መሆኑም ታወቋል።

የህወሃትን አካሄድ የተመለከቱ ስርዓቱ የማይማር እና ለለውጥ አለመዘጋጀቱን በገሀድ እያሳየ ነው፤ የተጀመረውንም የነፃነት ትግል ምላሽ የሚያገኘው ይህ ዘረኛ ስርዓት ሲወገድ በመሆኑ ትግሉን አጠናክሮ መቀጠል ዋናው እና ወሳኙ ሥራ ነው። ስለሆነም፣ ህዝቡ ህወሃትን ከህዝብ የመነጠል፣ የማዳከም፣ የሕወሐትን ምርቶች ባለመጠቀም ይህን ዘረኛ ስርዓት የሁላችን ጠላት በመሆኑ ትግሉም የሁላችን ስለሆነ ሕዝባዊ እንቢተኝነቱን ሁላችንም ልንቀላቀለው ይገባል ሲሉ ተደምጠዋል፡፡