በሞያሌ የተገደሉት ንጹሃን ኢትዮጵያኖች ቁጥራቸው ሲጨምር ኮማንድ ፖስቱ ግድያው በስህተት ነው ማለቱ ተሰማ

አባይ ሚዲያ ዜና 

በሞያሌ የመከላከያ ሰራዊት በወሰደው የሃይል እርምጃ የጦር መሳሪያ ያልታጠቁ ንጹሃን ኢትዮጵያኖችን መግደላቸው እና ማቁሰላቸው ቁጣን እየጫረ ይገኛል።

የመንግስት ወታደሮች በሞያሌ በሚኖሩ ንጹሃን ኢትዮጵያኖች ላይ በከፈቱት ተኩስ ህይወታቸውን ያጡት ነዋሪዎች ከ 15 በላይ እንደሚደርሱ ሪፖርቶች ያመለክታሉ። ይሁን እንጂ በወታደሮቹ የጥይት እሩምታ በሞያሌ ከተማ ህይወታቸውን የተነጠቁት ኢትዮጵያኖች ቁጥራቸው ከዚህ እንደሚያሻቅብ እየተነገረ ይገኛል። ወታደሮቹ በወሰዱት እርምጃ ከተገደሉት በተጨማሪ በርካታ ንጹሃን ነዋሪዎችም እንደተጎዱ እና እንደቆሰሉ ከቦታው የተገኙ መረጃዎች ያመለክታሉ።

በከተማው ውስጥ በሰላማዊ መንገድ የእለት ኑሮዋቸውን ሲመሩ በነበሩ ንጹሃን ነዋሪዎች ላይ የመከላከያ ሰራዊቱ በቀጥታ ተኩስ በመክፈት የህዝብ እልቂት እንዳደረሱ ተነግሯል።

የሞያሌ ከተማ ከንቲባ አቶ አስቻለው ዮሃንስ በከተማው አዲስ እልቂት እና አለመረጋጋት እንደተፈጠረ በመግለጽ የእልቂቱ መነሻ እየተጣራ እንደሆነ አሳውቀዋል።

የወታደሮቹን እርምጃ ተከትሎ ወደ ሆስፒታል የመጡት ቁስለኞች በሙሉ ጉዳቱ የደረሰባቸው በተተኮሰባቸው ጥይት እንደሆነ የሞያሌ ሆስፒታል ዳይሬክተር ገልጸዋል።

በአጨቃጫቂ ሁኔታ አገዛዙ ጸድቋል ያለው የአስቸኳይ ጊዜ አዋጁን ለመተግበር የተቋቋመው የኮማንድ ፖስትም ወታደሮች በሞያሌ ከተማ በንጹሃን ሰዎች ላይ ተኩስ ከፍተው  ግድያ እንደፈጸሙ በማሳወቅ ይህ ግን የሆነው በስህተት ነው በማለት ማስተባበያ ሰጥቷል።

የመንግስት ወታደሮች በሞያሌ ንጹሃን ኢትዮጵያኖችን መግደላቸውን እና ማቁሰላቸውን ተከትሎ ለአገዛዙ እምቢተኝነቱን እየገለጸ ያለው ህዝብ ቁጣውን በከፍተኛ ደረጃ እንደሚያንረው እየተነገረ ይገኛል።

በቦረና ሞያሌ የመንግስት መከላከያ ሰራዊት በፈጸሙት የግድያ ተግባር ህይወታቸውን ላጡ ንጹሃን ኢትዮጵያኖች የተሰማንን ሃዘን እየገለጽን ለቤተሰቦቻቸው እና ለወዳጆቻቸው መጽናናትን እንመኛለን።