እርምሽን አውጪ ተውኔት / ከግርማ ቢረጋ /

0

img_photoprocessed_picture
እምዬ እናት ዓለም ብሎ ሲምል ላየ ፣
ፈገግታውን ላስተዋለ ።

የለም ፍፁም እሱ አይሞትም ፣
ከመድረኩ ከቶ አይርቅም ።

ከሄደበት ብንን ብሎ ፣
የተውኔትን ምናብ አስተውሎ ።

ደስታ ሳጉን አዋህዶ ፣
በመንፈስ ርቆ ሄዶ ተሰዶ ።

እና ታዲያ ምነው ዛሬ ፣
ስለ አንተ ስም መሸበሬ ።

ፍቄ ክብሬ ብላ ተጣርታ ፣
መልስ ያጣችው ያች ክርታታ ።

እሷው እራሷ ተውኔት ፣
የሆንክባት አበምኔት ።

አልቻለችም ዝም አላለች ፣
ከፍ አድርጋ ተጣራች ፣
ፍፁም ባንተ ሳትሰላች ።

ምነው ፍቄ ዝም አልክሳ ፣
በአንተ መቅረት ጥበብ ትክሳ ?

ብታጣህ ነው ብትቀርባት እንደዋዛ ፣
ጭልጥ ብላ መተከዟ ።

የመጣባት የለቅሶ ጋት ፣
ዋጥ አድርጋው አስጨንቋት ።

በአንተ አያምርም ዝም ማለቱ ፣
እሷ ጠንቶባት ማቃሰቱ ።

ፍቄ ብላ ደግማ ደጋግማ ብትጣራ ፣
የሌለብህን ምንም ሳትራራ ።

ያው ዝም ነው ምንም የለ ፣
ሽብር ስጋቷ ብዙ አየለ ።
እኔስ ፈራሁ መድረክ ለአንቺ ፣
ልጅሽን ፍለጋ ስትባቺ ።

እውነት ሆነልሽ ጉድሽ ከፋ ፣
ላይመለስ ልጅሽ ርቆ ጠፋ ።
ማን ያስውብሽ ማን ይተርክ ፣
እንዳላስያዘሽ የደስታ ብርክ ።

በቃሽ ፀጥ በይ ፍዘዥበት ፣
ላታገኝው ያን አንደበት ።

ሄደ ርቆ ካንቺ ሸሸ ፣
ምን አርገሽው ምን ተዋሸ ።

ብቻ እንዳይሆን ተቀይሞ ፣
ባንቺ ፍቅር ብዙ ታሞ ።

ሞትን ካሳ ሰጥቶ ለመድረኩ ፣
ላይመለስ ተጠግቶ ከአምላኩ ።

በቃ ሸሸ ካንቺ እራቀ ፣
ተውኔት ውበትሽ ደረቀ ።

ተሸኘልሽ በቃ ሄደ ፣
ላይመለስ ተሰደደ ።

ዙሪያ ገባውን ተመልከቺ ፣
ባንቺ ፍቅር ሆነ ሟች ።

ተንሰቅሰቂ ቢወጣልሽ ፣
የእግር እሳት እንዳይሆንብሽ ፣
ላይመለስ ላሸለበው ላድባርሽ ።
ያቁምልሽ የእንባሽ ጎርፉ ፣
በቃ ቀረ በመድረክ ላይ መንሳፈፉ ።

በቃ ተመኚለት ዝምታ ፣
እሱም አለበት የእመብርሃን ውለታ ።

ይበቃሻል እርምሽን አውጪ ፣
ጊዜው አልፎ እንዳትቆጪ ።

እርምሽን አውጭ ተውኔት በቃ ይበቃሻል ፣
እርም ላይመለስ ከአንቺ ተሰናብቷል ።

መታሰቢያነቱ ለመድረኩ ንጉስ ፍቃዱ ተ/ ማርያም
ግርማ ቢረጋ
ስቶክሆልም
ኦገስት 2018