ሀረር ከለውጡ እንቅስቃሴ ማግስት ከአናሳዎች አድሎአዊ አገዛዝ ወደ አክራሪ ዘረኞች አገዛዝ መሻገር የለባትም (በኤድመን ተስፋዬ )

0

መቀመጫውን አትላንታ አሜሪካ ያደረገውና አእምሮ ጤና ላይ ጥናቱን የሚያደርገው The American Institute for Cognitive Therapy እ.ኤ.አ በ 2017ባወጣው ጥናት እንደሚያትተው ዘረኝነት አንዱ የአይመሮ መታወክ(እብደት)ምልክት እንደሆነ ነው። ይህ ጥናት ደሞ በእኔ እምነት እራሳቸውን ያለውክልና፣ ወኪል ባደረጉ ካፋቸው እኛ የሚል ሀረግ የማይጠፋው እብዶች የሚዘውሩት የዘረኝነትፓለቲካ ምን ያህል ሀገራችን ላይ አደጋ እየጋረጠ እንደሆነ የሚያሳየን ይመስለኛል።

ወደ መቶ ሰማንያ አምስት ሺህ የሚጠጋው የሀረር ከተማ እና ገጠር ገበሬ ማህበር ህዝብ ላለፉት ሀያ ሰባት አመታት በዋናነት በሀረሪ ብሄራዊ ሊግ እንዲሁም በአጋዥነት ደሞ በቀድሞው ስሙ ኦህዴድ በአዲሱ ስሙ ደሞ ኦዴፓ  የዘረኝነት እና የሌብነት አገዛዝ ስር ፍዳውን ሲያይ ቆይታል። የሀረር ወጣት ባለፉት  ሀያ ሰባት አመታት በብሄሩ፣ ከፍ ሲለም ኢትዮጵያዊነቱን በማስቀደሙ በሀብሊ የዘረኝነት እና በኦህዴድ የሌብነት አገዛዝ ፍዳውን ሲያይ መቆየቱ የአደባባይ ሚስጥር መሆኑ ውሎ አድራል። የዶ/ር አብይን የለውጥ አገዛዝ ተከትሎ ደሞ ሀረር ከ ሀብሊ ዘረኝነት አገዛዝ ወደ ኦዴፓ ውስጥ በተሰገሰጉ እና ከአብይ የለውጥ እንቅስቃሴ በተቃራኒ በተሰለፉ ስግብግብ ዘረኞች፣ የዘረኛ አገዛዝ ስር ለመውደቅ ከጫፍ የደረሰች ትመስላለች። ለዚህ አንደኛው ማሳያው ደሞ የዶ/ር አብይን የለውጥ እንቅስቃሴ ተከትሎ ከዶ/ር አብይ በቀረበለት ጥያቄ መሰረት ወደ ሀገር ቤት የገባው አርበኞች ግንቦት ሰባት በሀረር ከደጋፊዎቹ ጋር ሊያደርገው የነበረው ውይይት እና በሀረር የሚገኙ ደጋፊዎቹ ሊያዘጋጁት ያሰቡት የእንኳን ደህና መጣችሁ ዝግጅት ክልሉን እያስተዳደሩ ባሉ ሀይሎች መከልከሉ ነው።

ካለፉተ ሶስት እና አራት አመታት ወዲህ በተለይም በሀገራችን ለተከሰተው የለውጥ እንቅሰቃሴ መንስኤ የሆነው የወጣቶች እምቢተኝነት ከሀገራችን ሰማይ ስር ከዳር እስከዳር መቀጣጠሉን ተከትሎ ሀረርን በዋናነትም ሆነ በአጋዠነት ሲያስተዳድሩ የነበሩት የሀረሪ ብሄራዊ ሊግ እና የኦሮሞ ዲሞክራሲያዊ ፓርቲ የክልሉን ህዝብ ጥያቄ በተለይም የወጣቱን ትውልድ ጥያቄ መመልስ ባለመቻላቸው በተለይም ደሞ የሀረሪ ብሄራዊ ሊግ ከፊቱ ሊመጣ የሚችለውን አደጋ በመፍራት ለምስራቅ እዝ መከላከያ ባቀረበው የአግዙኝ ጥያቄ መሰረት ክልሉ በቀጥተኛም ሆነ ቀጥተኛ ባልሆን መልኩ የክልሉ እንቅስቃሴ በመከላከያው መነጥር ውስጥ ነበር።

ሀረር ከለውጡ  ማግስትስ?

መደበኛም ሆኑ መደበኛ ያልሆኑ መረጃዎች እንደሚያመላክቱት የሀረር አስተዳደር ከሞላ ጎደል እራሳቸውን በለማ መገርሳው ኦዲፓ በደበቁ ማለትም የኦዴፓ አባል በሆኑ፣ ነገር ግን በለማ ከተጠነሰሰው ሀገራዊ ለውጥ በተጻራሪው በቆሙ አክራሪ ሀይሎች ለጊዜውም ቢሆን የሚዘወር መሆኑን ነው። እነዚህ በተለያየ የክልሉ ቢሮዎች የተሰገሰጉት እና መዋቅራቸውን የዘረጉት ዘረኞች በቀጥታም ይሁን በተዘዋዋሪ ከወቅታዊው የሀገራችንን ፓለቲካ ጋር እንዴት መሄድ እንዳለባቸው ብቻ ሳይሆን፣ ስለ ወቅታዊ የሀገራችን ፓለቲካ እንዴት ማሰብ እንዳለባቸው መምሪያ የሚሰጣቸው አውሮፓ፣አሜሪካ፣አውስትራሊያ እና አዲስ አበባ ከከተሙት ቱባ ዘረኞቹ ነው። እንግዲህ  እነዚህ በተለያየ የክልሉ ቢሮእዎች የተሰገሰጉት እና መዋቅራቸውን የዘረጉት ዘረኞች ናቸው አርበኞች ግንቦት ሰባት በሀረር ከተማ ሊያዘጋጅ የነበረውን ዝግጅት ፍቃድ በመከልከል ለጊዜውም ቢሆን ያገዱት።

በብሄር ፓለቲካ ሰበብ ላለፋት ሀያ ሰባት አመታት ፍዳውን ሲያይ የነበረውና አሁንም እያየ ከሚገኘው የሀረር ህዝብ ጋር የምንገኝበትን የሀያ አንደኛው ክፍለ ዘመን የሚመጥን የዜግነት ፓለቲካ የሚያራምደው የአርበኞች ግንቦት ሰባት እንዳይገናኝ ለጊዜውም ቢሆን መከልከሉ እንደ እኔ እምነት በአንድ በኩል እብዶቹ ዘረኞች  በህዝቡ ላይ ያደረሱት በደል ባደባባይ እንዳይነገርባቸውና ህዝቡ ችግሩን ወደሚቀርፍለት ሀይል ፊቱን እንደያዞር ከመፍራት የመነጨ ሲሆን በሌላ በኩል ደሞ በሌላ ባለተረኛ ያበደ ዘረኛ ቡድን የክልሉን ህዝብ ስቃይ በማራዘም የተወሰኑ ቡድኖችን ጥቅም ብቻ አስጠብቆ ከመሄድ የመነጨ እብዳዊ ፍላጎት ነው።

ዘረኝነት እብደት ነው፣ ሀረር ደሞ ዘረኝነት አይምሮአቸውን ባሳታቸው ግለሰቦች መዋቅር ውስጥ ወድቃለች። ይህ የሆነው ደሞ በሚያሳዝንም ሆነ በሚያስገርም መልኩ በሀገሪታ የለውጥ እንቅስቃሴ በሚደረግበትና የለውጥ ሀይሎቹ ማእከላዊ መንግስቱን ተቆጣጥረው ባሉበት ሁኔታ ነው። የሀረር ከተማን አስተዳደራዊ መዋቅር ተጠቅሞ የአርበኞች ግንቦት ሰባትን የሀረር ጉዞ ፍቃድ የከለከለው ቡድን ያጠቃው አርበኞች ግንቦት ሰባትን ብቻ ከመሰለን ተሳስተናል። ይህ ቡድን ጥቃቱን የሰነዘረው ሀገራዊ ለውጡም ላይ ነው። ለምን ቢባል አርበኞች ግንቦት ሰባት የሀገራዊ ለውጡ  አካል እንዲሆን በለውጡ መሀንዲሶች በነ ዶ/ር አብይ ጥሪ ተደርጎለት የገባና  ለሀገራዊ ለውጡ ሞተር ይሆናል ተብሎ የሚጠበቅ ሀይል ነውና።

ተወደደም ተጠላም ካሁን በኋላ እንዳለፉት ሀያ ሰባት አመታት ሁሉ፣ የአናሳዎች ፍላጎትም ሆነ የአክራሪ ዘረኞች ፍላጎት  በብዙሀኑ የሀረር ከተማ ህዝብ ላይ ሊጫን አይችልም። ከአሁን በኋላ  ሀረር  በምንም ተአምር ብዙሀኑ አናሳውንም ሆነ አክራሪ ዘረኛውን ችሎ የሚኖርባት ከተማ ልትሆን አትችልም። ይህ እንዲሆን ደሞ  በእኔ እምነት የለውጡ መሀንዲሶች በሀረር ከተማ ላይ በኦዴፓም ሆነ በሀብሊ ውስጥ የተሰገሰገውን ጸረ-ለውጥ ሀይል በምን መልኩ ወደ መስመር ይመልሰዋል አልያም ያጸዳዋል የሚለው ጥያቄ መልስ ማግኘት አለበት።