አባይ ሚዲያ ( መስከረም 27 ፣ 2012 ) የሕዝብ ያልሆነ ሐሳብ የበላይነት እየወሰደ እንደሆነና መንግሥት የልዩነትን ክብሪት ከፋብሪካው ሊያጠፋ እንደሚገባ የአማራ ክልል የሃይማኖት ተቋማት ጉባኤ አስታውቋል፡፡ ከሰሞኑ በአማራ ክልል አንዳንድ አካባቢዎች የተለያዩ ግጭቶች በተፈጠረባቸውና በግጭቱ አካባቢዎችም የሰው ሕይወት መጥፋቱን ተከትሎ  የአማራ ክልል የሃይማኖት ተቋማት ጉባኤ ትላንት በጽሕፈት ቤቱ መግለጫ ሰጥቷል፡፡

‹‹ኢትዮጵያ ውስጥ ስብጥር ማንነት፣ የተለያዬ ሃይማኖት፣ የበዛ ቋንቋ እና ባሕል ቢኖርም የእርስ በርስ ግጭት መንስኤ የሆነበት ዘመን ጎልቶ አይስተዋልም ነበር›› ያሉት የአማራ ክልል የሃይማኖት ተቋማት ጉባኤ ሰብሳቢ መልአከ ሠላም ኤፍሬም ሙሉዓለም ‹‹የሕዝብ ያልሆነ ሐሳብ የበላይነት እየወሰደ መሆኑ ለግጭት እየዳረገ ነው›› ብለዋል፡፡ ባለፈው ዓመት ከተፈጠረው ግጭት በመነሳት መሰል ግጭቶች እንዳይከሰቱ አቅደው እየሠሩ መሆኑን የተናገሩት መልአከ ሠላም ኤፍሬም ሙሉዓለም በከፍተኛ ትምህርት ተቋማት ወጣቶችን የማስተማር ሥራ እና የሃይማኖት ተቋማትን ከግጭት ነፃ ለማድረግ እየተሠራ መሆኑንም ተናግረዋል፡፡ ‹‹እምነትና ሚስማር ሲመቱት ይጠብቃል›› ያሉት መልአከ ሠላም ኤፍሬም በሃይማኖቶች መካከል ልዩነትን በመፍጠር ወደ ግጭት እንድንገባ የሚጥሩ አካላት አንድነታችን ይበልጥ ያጠነክሩታል፤ መንግሥት ችግሩን በዝምታ ከመመልከት እና ችግር ሲፈጠር እሳት ለማጥፋት ከመሯሯጥ ይልቅ የልዩነትን ክብሪት ከፋብሪካው ሊያጠፋ ይገባል›› ብለዋል፡፡

ሕዝቡ በምሕላ ጸሎት እና በሠላማዊ ሰልፍ ያለምንም ልዩነት አንድ መሆኑን ባሳየበት መንፈስ ችግር ፈጣሪዎችን በመምከር፣ በመከላከል እና በመገሰፅ ኅብረቱን ሊያሳይ እንደሚገባም አሳስበዋል፡፡ የሃይማኖት ተቋማት ጉባኤው በመግለጫው ሁሉም የሃይማኖት መሪዎች በየቤተ እምነቶቻቸው ስለሠላም እንደሚያስተምሩ እና ወላጆቻቸውን ላጡ ተጎጂዎች ድጋፍ እንደሚያደርጉም አሳስቧል፡፡

LEAVE A REPLY

Please enter your comment!
Please enter your name here