አባይ ሚዲያ ዜና – ጥቅምት 3፣ 2012

ተቀማጭነታቸውን ኬንያ ናይሮቢ ያደረጉ የአፍሪካ አምባሳደሮች ዶ/ር አብይ አህመድ የኖቤል ሽልማት ማሸነፋቸው ለኢትዮጵያ ለውጥ እና ለጠቅላይ ሚኒስትሩ አመራር የተሰጠ እውቅና መሆኑን ገልጸው ሽልማቱም የአፍሪካውያን ሽልማት ነው ብለዋል።

አምባሳደሮቹ ጥቅምት 2 ቀን 2012 ዓ.ም በኢትዮጵያ ኤምባሲ በመገኘት የጠቅላይ ሚኒስትር ዶ/ር አብይን መሸለም በማስመልከት ባደረጉት ዝግጅት የኖቤል ሽልማቱ ለኢትዮጵያ የሚመጥን ለጠቅላይ ሚኒስትሩ የሚገባ መሆኑን ገልጸዋል።

ሽልማቱ ሁሉንም የአፍሪካ ሀገራት ያኮራ እና አፍሪካውያን የራሳቸውን ችግር በራሳቸው መፍታት መቻላቸውን የሚያሳይ ነው ብለዋል።

በኬንያ የኤርትራ አምባሳደር እና የአፍሪካ አምባሳደሮች ዲን አምባሳደር በየነ ርእሶም በበኩላቸው ዶ/ር አብይ የሁላችንም ኩራት ናቸው ብለዋል።

አምባሳደር መለሰ አለም ሽልማቱ ለአፍሪካውያን የተሰጠ እንደሆነ ገልጸው አፍሪካውያን ላሳዩት ድጋፍና ወገንተኝነት ምስጋናቸውን አቅርበዋል።