አባይ ሚዲያ ዜና- ጥቅምት 25፣2012

የሲዳማ ዞን የክልልነት ጥያቄ ህዝበ ውሳኔ የድምፅ ሰጪዎች ምዝገባ ከነገ ጀምሮ እንደሚካሄድ የተገለጸ ሲሆን ህዝበ ውሳኔው ደግሞ ህዳር 10 ቀን 2012 ዓ.ም እንደሚካሄድ ቀን ተቆርጦለታል።

ህዝበ ውሳኔውን በበላይነት የሚያስፈፅመው የብሄራዊ ምርጫ ቦርድ ከ6ሺህ የሚልቁ የምርጫ አስፈጻሚዎችምን ትላንት ወደ ሀዋሳ ከተማና የሲዳማ ወረዳዎች ልኳል፡፡

ኢትዮ ኤፍ ኤም ተመልምለው ወደ ሀዋሳ ከተላኩት የምርጫ አስፈጻሚዎች ከ400 የሚልቁ አስፈጻሚዎች አሁንም በሀዋሳ ከተማ እንግልት እየደረሰባቸው ነው ሲል ዘግቧል፡፡

አንድም የሚያናግረን ሰው አጥተናል የሚሉት ቅሬታ አቅራቢዎቹ ምላሽ የሚሰጠን እና የምናናግረው አንድም ሰው የለም ወደ ብሔራዊ ምርጫ ቦርድም ብንደውል የስራ ሀላፊዎቹ ስልካችን ዘግተዋል ይላሉ፡፡

የሲዳማ ዞን ዋና አስተዳዳሪ አቶ ደስታ ሌዳሞ እንደተናገሩት በእኛ በኩል ማድረግ ያለብንን ዝግጅት አድርገናል እንደተባለው የአስጻሚነት ቦታቸውን ያላወቁ ከ400 የሚልቁ ወጣቶችን አግኝተን አናግረናል ፡፡

እኛ መመደብ ስለማንችል ለሚመለከተው የምርጫ ቦርድ ነገሩን አሳውቀናል እስከዛው ግን የሀዋሳ ከተማ አስተዳዳርና የሲዳማ ዞን ቁርስ እና ምሳ እንዲያገኙ ለማድረግ እየተሯሯጥን ነው ብለውናል፡፡
ይህ እንዴት ተፈጠረ ለሚለው ግን የስራው ባለቤት እኛ ሳንሆን ብሔራዊ ምርጫ ቦርድ ነው ብለዋል አስተዳዳሪው፡፡

በህዝበ ውሳኔው የሀዋሳ ከተማን ጨምሮ በሲዳማ ዞን በሚገኙ 66 ወረዳዎች እስከ 2 ሚሊዮን የሚደርሱ ነዋሪዎች ለመራጭነት ይመዘገባሉ ተብሎ እንደሚገመት አቶ ደስታ ተናግረዋል፡፡

የመራጮች ምዝገባ በሀዋሳ ከተማና በሲዳማ ዞን ወረዳዎች በሚገኙ 598 ቀበሌዎችና በ1ሺህ 692 የምርጫ ጣቢያዎች ይካሄዳል፡፡