አባይ ሚዲያ ዜና-ታህሳስ 22፣ 2012

የሕዝባዊ ወያኔ ሓርነት ትግራይ (ሕወሓት) ጠቅላላ ድርጅታዊ ጉባዔ በተያዘው ሳምንት ማጠናቀቂያ ላይ እንደሚካሄድ፣ የፓርቲው ሥራ አስፈጻሚ ኮሚቴ አባል አቶ ጌታቸው ረዳ አስታወቁ።

አቶ ጌታቸው እንደገለጹት የሕወሓት ሥራ አስፈጻሚ ኮሚቴ፣ እንዲሁም ማዕከላዊ ኮሚቴው የኢሕአዴግ አባል ድርጅቶች ውህደትን አስመልክቶ ቀደም ሲል ባሳለፋቸው የውሳኔ ሐሳቦች ላይ ጠቅላላ ጉባዔው ተወያይቶ የመጨረሻ ውሳኔ ያሳልፋል፡፡

በተጨማሪም ሕወሓት ወደፊት በሚከተላቸው ጉዳዮች ላይም ጠቅላላ ጉባዔው መክሮ ውሳኔ እንደሚያሳልፍ ተናግረዋል።

የኢሕአዴግ አባል ድርጅቶችን ለማዋሀድ የታለፈው ሒደት የግንባሩን መተዳደሪያ ደንብ የጣሰ እንደሆነ የገለጹት አቶ ጌታቸው፣ ጠቅላላ ጉባዔው በሚያሳልፈው ውሳኔ መሠረት ውህደቱ የተፈጸመበት መንገድ ሕግን የጨፈለቀ እንደነበር ለማሳየት ሕወሓት በቀጣይ ሊንቀሳቀስ እንደሚችልም ጠቁመዋል።

“በሕገወጥ  መንገድ” ቢሆንም ኢሕአዴግ መፍረሱ አሁን እርግጥ መሆኑን የተናገሩት የሕወሓት ሥራ አስፈጻሚ ኮሚቴ አባሉ አቶ ጌታቸው፣ “ሦስቱ የኢሕአዴግ አባል የነበሩ ድርጅቶችና አጋሮች በውህደት አዲስ ፓርቲ የመመሥረት መብት ቢኖራቸውም ኢሕአዴግን መውረስ አይችሉም፤” ብለዋል።

ምርጫ ቦርድ በውህደት ለተፈጠረው ፓርቲ ዕውቅና ከመስጠት ባለፈ አዲስ የተመሠረተው ብልፅግና ፓርቲ የኢሕአዴግ ወራሽ ስለመሆኑ ቦርዱ ያስተላለፈው ውሳኔ አለመኖሩን፣ ይህንንም መወሰን ቦርዱ እንደማይችል ገልጸዋል።

ነገሮች ወደዚህ የሚያመሩ ከሆነ ግን ሕወሓት እስከ መጨረሻው ድረስ ሕጋዊ ትግል እንደሚያደርግ፣ ይህንንም የሚያደርገው ኢሕአዴግ የተለየ ድርጅት ሆኖ ኢሕአዴግን ለማዳን እንደማይሆን ተናግረዋል። ይልቁንም የአገሪቱ ፖለቲካ ሕጋዊነትን የተከተለ፣ የአገሪቱ ተቋማትም ሕጋዊ ኃላፊነታቸውን መወጣት አለባቸው ከሚል መርህ እንደሆነ ገልጸዋል።

በምርጫ ሕጉ መሠረትም በሕወሓት ጠቅላላ ጉባዔ ላይ በታዛቢነት እንዲገኝ ለምርጫ ቦርድ ጥሪ መደረጉን አስታውቀዋል።

በአገራዊና ክልላዊ ወቅታዊ የፖለቲካ ጉዳዮች ላይ የመከረ የትግራይ ሕዝብ ጉባዔ፣ ከቅዳሜ ታህሳስ 18 ቀን 2012 ዓ.ም. ጀምሮ ለሁለት ቀናት በመቀሌ ሲያካሂድ የሕወሓት አመራሮችን ጨምሮ የትግራይ ሕዝብን የወከሉ ተሳታፊዎች ገዥው ፓርቲ ኢሕአዴግ በሕገወጥ መንገድ እንዲፈርስ መደረጉን በመግለጽ ማውገዛቸው ይታወቃል ሲል ሪፖርተር ጽፏል፡፡