OLYMPUS DIGITAL CAMERA

አባይ ሚዲያ ዜና- ታህሳስ 23፣2012 ዓ.ም

ለአመታት የዘለቀው የአማራ እና የቅማንት ግጭት ዛሬም ድረስ መፍትሄ አለማግኘቱን የጎንደር ከተማ ነዋሪዎች ለአባይ ሚዲያ ገልጸዋል፡፡

በጎንደር ከተማ  እና በሰሜንና ምዕራብ ጎንደር ዞኖች በሚገኙ አካባቢዎች  ለበርካታ ዓመታት መፍትሐየ ያላገኘው የአማራ እና የቅማንት ጦርነት የቀዘቀዘ ቢመስልም ዛሬም ንጹሀንን ህይወታቸውን እያሳጣቸው መሆኑን የአካባቢው ነዋሪዎች ይገልጻሉ፡፡

በዚህ ሳምንት ብቻ ሰሜን ጎንደር ጠገዴን ጨምሮ በሌሎች የዞኑ አካባቢዎችና ጠጎንደር ከተማ አንገረብ አካባቢ ከአስር በላይ ሰዎች በጥቃቱ ለህልፈት መዳረጋቸውን ጎንደር ከተማ የሚገኙ የአባይ ሚዲያ ምንጮች ገልጸዋል፡፡

በየጊዜው ለሚፈጸሙ ጥቃቶች የቅማንት ኮሚቴ አባላት እጃቸው እንዳለበት ቢነገርም የትኛው ግለሰብና ቡድን ጥቃት እንደሚፈጽም መንግስት ተገቢውን የማጣራትና የቁጥጥር ስራ እያደረገ ባለመሆኑ ግጭቱ መፍትሄ አለማግኘቱን ነዋሪዎች ገልጸዋል፡፡

ምንም እንኳን በአካባቢው የመከላከያ ሰራዊት ቢኖርም ተገቢውን ግዴታ ከመወጣት ይልቅ በየጊዜው ጥፋት ሲፈጸም የሚያሳየው ቸልተኝነት ነዋሪዎችን ወደ ሌላ ጥርጣሬ ውስጥ እንዳስገባቸው ገልጸው በቅማንት ኮሚቴ አባላትና በመከላከያ ሰራዊት አመራሮች መካከል ያለው የውስጥ ለውስጥ ቁርኝት በግልጽ የሚታይ እንደሆነ ገልጸዋል፡፡

ጥቃት ፈጻሚዎቹ የሚንቀሳቀሱበት የዞኑ አካባቢዎች በግልጽ የሚታወቅ ነው የሚሉት ምንጫችን መንግስት ህግ ለማስከበር ያለው ጥኩረት አነስተኛ በመሆኑ የዞኑ ልዩ ሀይል ተደራሽ በማይሆንባቸው አካባቢዎች በመንቀሳቀስ ጥቃት እንደሚፈጽሙ ገልጸዋል፡፡

ለአብነትም አንገረብ አካባቢ ጥቃት ማድረስ የቻሉት አካባቢውን ይጠብቁ የነበሩ የክልሉ ልዩ ሀይል አባላት ለስልጠና ወደ ባህር ዳር መሄዳቸውን ተከትሎ እንደሆነና ለጥቃት ፈጻ ሚዎች ከዞን ፖሊስ መምሪያ ጥቆማ እንደተሰጣቸው ነዋሪዎች ለአባይ ሚዲያ ገልጸዋል፡፡

ከመጭው የጥምቀት በዓል ጋር በተያያዘ ከተማዋ ስጋት ውስጥ መሆኗን ምንጫችን ለአባይ ሚዲያ አስታውቀዋል፡፡