አባይ ሚዲያ ዜና-ጥር 5፣2012

የሲዳማ ክልል የሚመራበት ህገ መንግስት በረቂቅ ደረጃ ተጠናቋል ሲሉ የሲዳማ ዞን ዋና አስተዳዳሪ አቶ ደስታ ሌዳሞ ገለፁ።

ዋና አስተዳዳሪው አቶ ደስታ ሌዳሞ ተቋማትን የመገንባት ስራ ከዚሁ ጎን ለጎን እንደሚካሄድ አስታውቀዋል።

በአሁኑ ወቅት አዲሱ የሲዳማ ክልል የሚመራበት የራሱ ህገ መንግስት በረቂቅ ደረጃ ተጠናቋል።

ህገ መንግስቱን የማርቀቅ ስራ ቀደም ሲል የተጀመረ ሲሆን ከተረቀቀም አንድ ዓመት ያህል ሆኖታል።

ረቂቅ ህገ መንግስቱ ላይ የሲዳማ ህዝብ አንድ ጊዜ እንዲወያይበት መደረጉን የተናገሩት አቶ ደስታ በህዝቡ መተቸቱና ማስተቸቱ እንደሚቀጥልም አስታውቀዋል።

ይህም በአንድ ወር ውስጥ ይጠናቀቃል ተብሎ እንደሚጠበቅ አስረድተዋል።

እንደ እርሳቸው ገለፃ ረቂቅ ህገ መንግስቱ በህዝቡ ከተተቸ በኋላ በትችቱ ወቅት የተገኙ ግብዓቶችን አካቶ የመጨረሻው ረቂቅ ይወጣል።

እሱንም የምክር ቤት አባላት በአግባቡ አይተው የሚያጸድቁት ይሆናል። ከዚህ በኋላ ሲዳማ ውስጥ የሚሰራው ስራ ሁሉ ህግን መሰረት ያደረገ ይሆናል ብለዋል።

ከዚህ ጎን ለጎን ተቋማትን የመገንባት ስራ እንደሚካሄድ አቶ ደስታ አስታውቀዋል።

ስራው ሁሉ በአንድ ጀምበር የሚያበቃ እንዳልሆነም ጠቁመው፤ የሲዳማ ክልል የሌላውን ተሞክሮ እየወሰደ እና በየጊዜው ራሱን እያበቃ እንደሚሄድም አመልክተዋል። እንዲህም ሲባል ወደ ክልል የሚያድገው በዞን ደረጃ ያለው መዋቅር መስመሩን ጠብቆ እንደሆነም አቶ ደስታ ገልፀዋል።

የመንግስት ማስፈፀሚያ አዋጅ ቀርቦም እንደሚፀድቅ ተናግረዋል።

የሲዳማ ህዝብም ደስታው ሙሉ የሚሆነው እነዚህ ነገሮች ሲከናወኑ እንደሆነም ገልፀዋል። የሲዳማ የክልልነት ጥያቄ በህዝበ ውሳኔ አብላጫ ድምጽ ማግኘቱ የሚታወስ ነው፡፡