አባይ ሚዲያ ዜና – ጥር 14፣2012

ሰኔ 16 ቀን 2010 በአዲስ አበባ መስቀል አደባባይ ጠቅላይ ሚኒስትር አብይ አህመድን ለመደገፍ በተደረገው ሰልፍ ላይ የደረሰውን የቦምብ ፍንዳታ ተከትሎ በድርጊቱ ላይ እጃችው አለበት ያላቸው 5 ግለሰቦች ላይ የፌደራል ጠቅላይ አቃቤ ህግ ክስ መመስርቱ ይታወሳል።

በሽብር ወንጀል ክስ የተመሰረተባቸው ጌቱ ግርማ፣ ብርሀኑ ጁፋር ፣ ጥላሁን ጌታቸው ፣ ባህሩ ቶላ እና ደሳለኝ ተስፋዬ ጉዳያቸውን ለመከታተል ትላንት ማለትም ጥር 13/2012 ዓ.ም በፌደራል ከፍተኛ ፍርድ ቤት ልደታ ምድብ 1ኛ የጸረ ሽብር ወንጀል ችሎት ቀርበው ነበር።

የመከላከያ ምስክሮቻቸውን እና ማስረጃዎቻቸውን አቅርበው ሲከላከሉ የሰነበቱት ተከሳሾቹ ከዚህ ቀደም በሰጡት መግለጫ ላይ ማረጋገጫ እንዲሰጡ የኢፌደሪ መከላከያ ሚኒስትር አቶ ለማ መገርሳ እና ዋና ጠቅላይ አቃቤ ህግ ብርሀኑ ጸጋዬን በምስክር ዝርዝር አካተው ነበር።

የተከሳሾች ጠበቆች በችሎቱ ከፍተኛ የመንግስት ባለስልጣናት ቀርበው እንዲመሰክሩ ብንጠይቅም ምላሽ አላገኘንም፣ ከለውጡ በፊት ባለሰልጣናት በጽሁፍ እንኳን ምላሸ ይሰጡ ነበር አሁን ግን ይሄ እንኳን እየሆነ አይደለም ብለዋል።

አክለውም የትላልቅ ሀገራት መሪዎች እንኳን የፍርድ ቤት ጥሪ አክብረው በሚቀርቡበት ጊዜ የፖለቲካ ተሿሚዎች የፍርድ ቤት ትእዛዝ የማያከብሩ ከሆነ ፍርድ ቤቱ ራሱን ማስከበር አለበት በማለት ቅሬታቸውን አሰምተዋል።

በተጨማሪም 1 አመት ከ8 ወራት ያህል በእስር መቆየታቸውን በማስታወስ ያልተፋጠነ ፍትህ እንደተነፈገ ይቆጠራል ብለዋል።

ምስክሮቹ እንዲያረጋግጡ የተፈለገው የቪድዮ ማስረጃ መጀመሪያ መቅረብ አለበት ያለው ችሎቱ ማስረጃውን ተመልክተን ያ በቂ ከሆነ ምስክሮቹን መጥራት ላያስፈልግ ይችላል መጠራት ካለባቸው ግን ይጠራሉ ችሎቱ ከማዘዝ የሚያስፈራው ነገር የለም ሲሉ ዳኞች ለተከሳሾች አስረድተዋል።

ማስረጃው ከኦሮሚያ ብሮድካስት እና ከብሄራዊ መረጃ ሲቀርብ ለመመርመርም ለጥር 29 ቀጠሮ መስጠቱን ዋዜማ ራዲዮ ዘግባለች።

በዚህ የሽብር ወንጀል ክስ የ2 ሰዎች ህይወት ማለፉን እና ከ163 በላይ ሰዎች ላይ ጉዳት መድረሱን አቃቤ ህግ መጥቀሱ ይታወሳል።