አባይ ሚዲያ ዜና -ጥር 15፣2012

ከትናንት በስቲያ ጠቅላይ ሚኒስትር ዐብይ አህመድ የሚኒስትሮች ሹም ሽር ማድረጋቸው ተሰምቷል።

ከስልጣናቸው ከተነሱት መካከል ወ/ሮ ፈትለወርቅ ገብረ እግዚአብሄርና ከስልጣን እንደሚነሱ ደብዳቤ እንደደረሳቸው ለቢቢሲ ያረጋገጡት ዶ/ር ሰለሞን ኪዳነ ይገኙበታል፡፡

ይህን ተከትሎ ህወሃት ባወጣው መግለጫ አባላቱን ከፌደራል ከፍተኛ የሃላፊነት ደረጃዎች እንዲሁም ከአዲስ አበባ ከተማ አስተዳደር የማንሳት እርምጃ ህግን የጣሰና ችግርም የሚያስከትል ነው ብሏል።

ብልፅግና ፓርቲ በበኩሉ የተደረገው የተለመደ ሹም ሽር ስለሆነ ከብሄር እና ከፖለቲካ ጋር ማገናኘት አይገባም ሲል ምላሽ ሰጥቷል።

ዶ/ር ሰሎሞን ኪዳን በአዲስ አበባ በክፍለ ከተማ ደረጃ የሚገኙት የህወሓት ካድሬዎችና የስራ ኃላፊዎች በጠቅላይ ሚኒስትር ጽ/ቤት እየተነሱ በሌሎች አባል ባልሆኑ እየተተኩ  ነው ብለዋል።

“አዲስ አባባ ላይ እንደ ኢህአዴግ ነው የተወዳደርነው። ኢህአዴግ እስካሸነፈ ድረስ ህወሓት 25 በመቶ ቦታ አለው። እኩል የማስተዳደር ስልጣን አለው። ይህንን አሰራር ማፍረስ ማለት የከተማውን መንግሥታዊ አስተዳደር መዋቅር ማፍረስ ማለት ነው” በማለትም እርምጃው ህግና ስርዓትን የተላለፈ ነው ይላሉ።

ላለፉት 28 ዓመታት ስልጣን ላይ የቆየው ኢህአዴግ ወደ ብልጽግና ፓርቲ ሲሸጋገር ስሙን ብቻ ሳይሆን አብዮታዊ ዲሞክራሲ ርእዮተ ዓለሙን በመደመር ጽንሰ ሃሳብ ቀይሯል።

ህወሃት በዚህ ሂደት ውስጥ አካሄዱ ህገ-ወጥ ነው በማለት ብልፅግናን የማይቀላቀል መሆኑንን ማሳወቁ በፌደራል መንግሥትና በትግራይ ክልል መንግስት መካከል የተፈጠረውን ልዩነት ይበልጥ እንዳካረረው እየተስተዋለ ነው።

የህወሃት አባላትን ከፌደራልና ከአዲስ አበባ ከተማ አስተዳደር ሃላፊነት የማንሳት እርምጃም የዚህ መካረር ውጤት እንደሆነ ዶ/ር ሰለሞን ይናገራሉ።

መንግስት እርምጃውን ከመውሰዱ በፊት ህወሃትን ማማከር ነበረበት ብለው ያምናሉ።

“ህወሃት በህዝብ ተመርጦ እንጂ ለምኖ የመጣ ድርጅት አይደለም” የሚሉት ዶ/ር ሰለሞን፤ ህወሃት ከብልጽግና ጋር አልወሃድም ስላለ ብቻ በትግራይ ህዝብ የተመረጡ ግለሰቦች እየተለዩ ከሃላፊነታቸው ማንሳት የህዝብን ድምጽ  እንደመቀማት ይታያል ሲሉ ይከራከራሉ።

“የተመረጠው ኢህአዴግ እንጂ ብልጽግና አይደለም” በማለትም መከራከሪያቸውን ማቅረባቸውን ቢቢሲ ዘግቧል