አባይ ሚዲያ ዜና -ጥር 19፣2012  

የጠቅላይ ሚኒስትር ጽህፈት ቤት የፕሬስ ሴክሬታሪያት ኃላፊ አቶ ንጉሱ ጥላሁን ከአሁን በፊት በተለያዩ የመገናኛ ብዙኃን የታገቱት ተማሪዎችን በተመለከተ የሰጡት መረጃ ትክክል መሆኑን ደግመው ተናግረዋል።

በደምቢዶሎ በሠጡት መግለጫ ሲናገሩም “21 ተማሪዎች መለቀቃቸውን ስንገልጽ የታጋቾቹ ቁጥር በወቅቱ አሁን ከሚባለው በላይ ነበር። በዚህ ድርጊት እኛ የቁጥር ጨዋታ ሳይሆን በተጨባጭ ታግተው የነበሩ እና የተለቀቁ ሰዎችን ቁጥር ነው ያሳወቅነው። እየሠራን ያለነውም እንደ መንግሥት ኃላፊ ብቻ ሳይሆን እንደ ታጋች ቤተሰብ ሆነን ነው።” ብለዋል።

አቶ ንጉሱ ጨምረውም “ተለቀቁ ብለን መግለጫ የሰጠነውም እውነት ነው። 21 የታገቱ ተማሪዎች ተለቅቀዋል፤ ቀሪዎቹን ለማስለቀቅ በትኩረት እየሠራን ነው” ሲሉ ተናግረዋል።

ይህ በአንዲህ አንዳለ የፌዴራል መንግሥት ልዑክ የታገቱ ተማሪዎችን በተመለከተ በደምቢ ዶሎ ዩኒቨርሲቲ ትናንት ተወያይቷል፡፡

በውይይቱ የሰላም ሚኒስትሯ ወይዘሮ ሙፈሪያት ካሚልን ጨምሮ ሌሎች ከፍተኛ የመከላከያ እና የደኅንነት ኃላፊዎች ተሳትፈዋል፡፡

በአካባቢው ባለሀብቶችን ጨምሮ ሌሎች ግለሰቦች ላይም እገታ እየተፈጸመባቸው እንደሆነ በውይይቱ ተገልጧል፡፡

የደምቢዶሎ ዩኒቨርሲቲ ፕሬዝዳንት ደግሞ ከታገቱት 17 ተማሪዎች መካከል 12ቱ የዩኒቨርሲቲው ተማሪዎች መሆናቸውን ከተማሪዎች የመረጃ ሰነድ መረጋገጡን ተናግረዋል፡፡

የፌደራል ፖሊስ ኮሚሽን ኮሚሽነር እንደሻው ጣሰው ደግሞ የአጋቾችን ማንነት፣ ያገቱበትን ምክንያት እና እንዴትና ለምን ታገቱ? የሚለውን ጉዳይ ለማወቅ ከፍተኛ የምርመራ ቡድን ተዋቅሮ በቅንጅት እየተሠራ መሆኑን ገልጸዋል፡፡

የታገቱ ተማሪዎችን ጉዳይ በተመለከተ በምክትል ጠቅላይ ሚኒስትር አቶ ደመቀ መኮንን የሚመራ አጣሪ ኮሚቴ እየተከታተለው እንደሚገኝም በውይይቱ ተገልጧል፡፡

በሌላ በኩል በአዲስ አበባ ለቅዳሜ የተጠራው ሰልፍ ደብዳቤ ለከንቲባ ጽ/ቤት ገብቷል

ከደምቢዶሎ ዩኒቨርሲቲ የታገቱ ተማሪዎች ያሉበት ሁኔታ በግልጽ መታወቅ አለበት እንዲሁም በአስቸኳይ ሊለቀቁ ይገባል በሚል በአዲስ አበባ ለፊታችን ቅዳሜ ጥር 23/2012 የተጠራው ሰልፍ ጉዳይ በደብዳቤ ለከንቲባ ጽ/ቤት መግባቱን የሰልፉ አስተባባሪዎች ለአባይ ሚዲያ ገልጸዋል፡፡