አባይ ሚዲያ ጥር፤2012

 

የኢትዮጵያ ዜጎች ለማኅበራዊ ፍትህ (ኢዜማ) በአዲስ አበባ ከተማ 22 አካባቢ ፖሊስ በወሰደው እርምጃ እና በቴፒ ከተማ በተቀሰቀሰ ግጭት የዜጎች ሕይወት በማለፉ የተሰማንን ጥልቅ ሀዘን እንገልፃለን ብሏል ኢዜማ የሕግ አግባብን በተከተለ እና ግልፅነት ባለው መንገድ ሕግ እና ሥርዓትን ማስከበር ሲቻል ጨለማን ተገን በማድረግ በአዲስ አበባ ከተማ 22 አካባቢ ለቤተክርስቲያን አገልግሎት የተያዘን ቦታ ለማስለቀቅ በሚል በተወሰደው የኃይል እርምጃ የሁለት ወጣቶች ሕይወት ተቀጥፏል ሲል በሀዘን መግለጫው አስፍሯል፡፡

በዚህም የወጣቶቹን ሕይወት ያጣነው ጉዳዩን በሰላማዊ መንገድ ለመፍታት በቂ ጥረት ሳይደረግ በተወሰደ የኃይል እርምጃ መሆኑ እጅግ አሳዛኝ እና አሳፋሪ ነው ሲል ኢዜማ ያስረዳል በሌላ በኩል በቴፒ ከተማም በተቀሰቀሰ ግጭት የዜጎች ሕይወት ጠፍቷል፤ በርካቶችም ቆስለዋል ያለው ኢዜማ  በአካባቢው ያለው ችግር ለረጅም ጊዜ ሲንከባለል የከረመ በመሆኑ በየጊዜው እያገረሸ ዜጎች ላይ ለሚደርስ ጉዳት ምክንያት እየሆነ ነው ብሏል፡፡

ኢዜማ በመግለጫው መንግሥት በአካባቢው ያለውን ችግር ትኩረት ሰጥቶ በመፍታት ሰላም የማስፈን እና የዜጎችን ደኅንነት የመጠበቅ ኃላፊኑቱን እንዲወጣም አሳስቧል ኢዜማ የፀጥታ አካላት ሕግና ሥርዓትን ለማስከበር በሚሠሩበት ጊዜ ሁሉ የዜጎችን ሰብዓዊ መብቶች እዲያክብሩ እና ዜጎችን ከጥፋት እንዲጠብቁ የተሰጣቸውን ሀገራዊ ኃላፊነት በአግባቡ እንዲወጡ እናሳስባለን ያለ ሲሆን መንግሥት ሕዝብን የመጠበቅ ግዴታቸውን የማይወጡ እንዲሁም ለዜጎች መጎዳት እና መበደል ምክንያት የሆኑ አካላትን አጣርቶ በአስቸኳይ ለሕግ እንዲያቀርብ እና ለሕዝብ እንዲያሳውቅ አጥብቀን እንጠይቃለን ሲል ያብራራል ይህ በእንዲህ እንዳለ ከትላንት ወዲያ ሌሊት በአዲስ አበባ በተፈጠረው ሁከት በጸጥታ አካላት በተተኮሰ ጥይት ከፍተኛ ጉዳት ደርሶበት ህክምና ላይ የነበረው አብረሃም የተባለ ወጣት ዛሬ ህይወቱ እንዳለፈ ለማወቅ ተችሏል በዚህም በተፈጠረው ረብሻ የሟቾች ቁጥር ሶስት ደርሷል ማለት ነው፡፡