አባይ ሚዲያ የካቲት 15፤2012

የስልጣን ርክክብ አለመፈፀም እና የምሁራን ኤጄቶች እስራት በሲዳማ ህዝብ ዘንድ ቁጣ እየቀሰቀሰ እንደሚገኝ የሲዳማ አርነት ንቅናቄ ሊ/መንበር አቶ ዱካለ ላሚሶ ተናገሩ አቶ ዱካለ ይህንን የተናገሩት የመድረክ አባል የሆነው የሲዳማ አርነት ንቅናቄ /ሲአን/ ትላንት በሀዋሳ ከተማ ሚሊኒየም አዳራሽ ከደጋፊዎቹና አባላቱ ጋር በተለያዩ ጉዳዮች ዙሪያ በተወያየበት ወቅት ነው።

በህዝባዊ የውይይት መድረኩ ላይ የመድረክ ሊቀ መንበር ፕ/ር መራራ ጉዲናን ጨምሮ የተለያዩ የመድረክ አጋር ድርጅቶች ተወካዮች ተገኝተዋል ሲአን ትላንት ባካሄደው ህዝባዊ ስብሰባ ላይ በህዝቡ ዘንድ ቁጣ እየቀሰቀሱ ያሉ ጉዳዮች በአፋጣኝ እልባት እንድያገኙ ለጠቅላይ ሚንስቴር ጽ/ቤት ደብዳቤ ከመፃፍ ጀምሮ በርካታ ስራዎች መሰራታቸውን አቶ ዱካለ በሪፖርታቸው ገልጸዋል ።

አቶ ዱካሌ ላሚሶ ሪፖርት ባቀረቡበት ወቅት እንዳሉት ደርግ ከፈጸመው በደል ያልተናነሰ የማይረሳ ጠባሳ በሲዳማ ህዝብ ላይ በዚህ በገዥው መንግስትም የተለያዩ በደሎች ተፈፅሟል ብለዋል ግንቦት 16/1994 ዓ.ም የተፈፀመው የሎቄ ጭፍጨፋ ለዚህ ማሳያ መሆኑን አንስተው ዛሬም በፖሊቲካ አሻጥር ንጹሃን የሲዳማ ተወላጆች ያለጥፋታቸው በተለያዩ እስር ቤቶች እየተሰቃዩ ይገኛሉ ብለዋል።

አክለውም አቶ ዱካሌ የስልጣን ርክክብ አለመፈፀም እና የምሁራን ኤጄቶች እስራት በሲዳማ ህዝብ ዘንድ ቁጣ እየቀሰቀሰ የሚገኘዉና በግዜ እልባት የሚያስፈልገው ጉዳይ እንደሆነም ጠቅሰዋል የሲዳማ የወጣቶች ቡድን የሆነው ኤጀቶ የደቡብ ክልል አመራሮች የስልጣን ርክክቡን ለማዘግየት እየጣሩ እንደሆነ እና ለሲዳማ አመራሮች ህዝቡን እንዲያሳምኑ አጀንዳ ተሰጥቷቸዋል በማለት መናገሩ የሚታወስ ነው፡፡

ቡድኑ ከሳምንት በፊት እንዳስታወቀው ደግሞ የሲዳማ ብሄራዊ ክልላዊ መንግስት ምስረታ የስልጣን ርክክብ እስከ ዛሬ ማለትም የካቲት 15/2012 ዓ.ም ድረስ የማይከናወን ከሆነ  ተቃውሞ እንደሚያስነሳ ማስጠንቀቁ አይዘነጋም፡፡