አባይ ሚዲያ መጋቢት 16፤2012

ብልጽግና ያካሄደው ውህደት ህጋዊና በአብላጫ ድምጽ ድጋፍ ያገኘ በመሆኑ ህወሃት ሊያቀርብ የሚችለው የሃብት ጥያቄ የለም ሲል የብልፅግና ፓርቲ አስታወቀ የብልጽግና ፓርቲ የሕዝብና ዓለም አቀፍ ግንኙነት ኃላፊ አቶ አወሉ አብዲ እንደተናገሩት አሁን ላይ ኢህአዴግ የሚባል ፓርቲ ፈርሷል፤ በእርሱ ምትክ ደግሞ በህጋዊነት ብልጽግና ፓርቲ ተቋቁሟል ስለዚህ ህወሃት ከማዕከል የሚካፈለው ምንም ዓይነት ንብረት የለም ብለዋል::

ብልጽግና ፓርቲ ያገኘው አብላጫው ድምጽ ኢህአዴግ የሚባለውን ፓርቲ አፍርሷል፤ ይህ ውሳኔ ደግሞ ያለውን ሀብት የብልጽግና ያደርገዋል  ከዚህ አንጻር ክልል ላይ ያለ ሃብት ካለ ያንን ይዞ መቀጠል እንጂ የሚካፈለው ነገር ይኖራል ተብሎ አይታሰብም ሲሉ ገልጸዋል ምርጫ ቦርድ ስለ ሃብት ያስቀመጠው ሀሳብ አለ ያሉት አቶ አወሉ፤ ይህም ቢሆን ግን በእኛ ዘንድ ተቀባይነት የለውም፤ ይህንንም በደብዳቤ አሳውቀናል፤ ለዚህ ዋና ምክንያታችን ደግሞ የፓርቲው መፍረስ በአብላጫ ድምጽ የተወሰነ መሆኑና ጥያቄውም አግባብነት ስለሌለው ነው ሲሉ አስረድተዋል::

ቀድሞም ቢሆን በፕሮጀክት ቢሮና ኢህአዴግ ምክር ቤት ላይ እኩል 45፣ 45 ሆነን ተቀመጥን እንጂ ሀብትን እኩል አላዋጣንም ያሉት አቶ አወሉ፤ እኩል ያላዋጠነውን የህዝብ ሀብት እንዴት እኩል እንካፈላለን ሲሉ ይጠይቃሉ? ከዚህ በፊትም ስናነሳ እንደነበረው ፓርቲው ከደጋፊዎች፣ ከአባሎች፣ ከነጋዴዎች እንዲሁም ከሌሎች በተለያየ ጊዜ የተሰበሰበ ሀብት አለው፤ ይህ ሀብት ካልሆነ ለህዝብ መመለስ አለበት እንጂ በግንባር አልያም እራሴን ከውህደት አግልያለሁ በሚል ሰበብ ህወሃት የማይገባውን የሚወስድበት ምንም ምክንያት እንደሌለ ጠቁመዋል::

አሁን ባለው አዲስ ነገር ከህወሃት ነባር አመራሮች መካከል አብዛኞቹ ወደ ብልጽግና ፓርቲ ተቀላቅለዋል ያሉት አቶ አወሉ፤ እነሱም ተሳትፎ ስለነበራቸው በሀብቱ ላይም ድርሻ አላቸው፤ በዚህ ላይ ዝርዝር አቅርበን በመጨረሻ ሰዓት ላይ እንሟገታለን አባላቱም የራሳቸውን መብት እንደሚያስከብሩ እናምናለን ሲሉ ተናግረዋል ::

የህወሓት ሥራ አስፈጻሚ ኮሚቴ አባል የሆኑት አቶ ጌታቸው ረዳ በበኩላቸው ምርጫ ቦርድ ፓርቲዎች ሲፈርሱ ተግባራዊ የሚሆን ስለ ሃብት ያስቀመጠው ዝርዝር ህግ ስላለ በዚያ መሰረት ህወሃት አንድ አራተኛ ሀብት እንዲካፈል ወስኗል፤ ይህ ግን እየሆነ አይደለም በእኛ በኩል ማሳወቅ ያለብንን አሳውቀናል፤ አሁን ቀሪው ህንጻ፣ መኪና እና ሌሎች ያሉትን ንብረቶች አይቶ ሁኔታዎችን አይቶ ውሳኔ ማስተላለፍ አለበት ብለን እናምናለን ብለዋል::