አባይ ሚዲያ መጋቢት 22፤2012

በኢትዮጵያ በኮሮናቫይረስ የተያዙ ተጨማሪ 3 ሰዎች ተገኙ በአጠቃላይ በኢትዮጵያ በኮቪድ 19 የተያዙ ሰዎች ቁጥር 25 መድረሱን የጤና ሚኒስቴር አስታውቋል።

የኢትዮጵያ የሕብረተሰብ ጤና ኢንስቲትዩት ይህ መረጃ እስከተጠናቀረበት ሰዓት ድረስ በአጠቃላይ 1013 የላቦራቶሪ ምርመራ ያደረገ ሲሆን ባለፉት 24 ሰዓታት ውስጥ 66 የላብራቶሪ ምርመራ አካሄዶ በኮቪድ 19 የተያዙ ተጨማሪ ሶስትሰዎች መኖራቸውን አረጋግጧል፡፡

በዚህም መሰረት በአጠቃላይ በሀገራችን በቫይረሱ የተያዙ ሰዎች ቁጥር 25 መድረሱን ነው የገለፀው በቫይረሱ መያዛቸው የተረጋገጡት ሁለት ግለሰቦች የ30 ዓመትና የ36 ዓመት ኢትዮጵያዊያን ሲሆኑ በተመሳሳይ በረራ ከዱባይ መጋቢት 15 ቀን 2012 ዓ.ም ወደ ሀገር የገቡ ሲሆን በአስገዳጅ የለይቶ ማቆያ ውስጥ የነበሩና የበሽታውን ምልክት ታይቶባቸው በተደረገላቸው የላብራቶሪ ምርመራ በቫይረሱ መያዛቸው ተረጋግጧል።

ሶስተኛዋ ታማሚ ደግሞ የ60 ዓመት እድሜ ያላቸው የአዲስ አበባ ከተማ ነዋሪ ሲሆኑ መጋቢት 6 ቀን 2012 ዓ.ም ከፈረንሳይ የተመለሱና ክትትል ሲደረግላቸው ቆይቶ የበሽታውን ምልክት በማሳየታቸው በለይቶ ማቆያ ውስጥ ሆነው በተደረገላቸው የላብራቶሪ ምርመራ በቫይረሱ የተያዙ መሆናቸውን ማረጋገጥ መቻሉን ሚኒስቴሩ አስታውቋል፡፡

ሶስቱም ታማሚዎች በለይቶ ህክምና መስጫ ማዕከል የህክምና እርዳታ እየተደረገላቸው እንደሚገኝም ተገልጿል በአሁኑ ሰዓት በሀገራችን በለይቶ ህክምና መስጫ ማዕከል የህክምና እርዳታ እየተደረገላቸው ያሉ ሃያ አንድ ታማሚዎች ሲኖሩ ሁለት ታማሚዎች በጽኑ ህሙማን ህክምና ክፍል ክትትል እየተደረገላቸው መሆኑን ነው ሚኒስቴሩ ያስታወቀው።

ከዚህ በፊት እንደተገለጸው ሁለት ታማሚዎች ወደ ሀገራቸው የተመለሱ ሲሆን ሁለት ታማሚዎች ሙሉ በሙሉ አገግመዋል። ነገር ግን ለጥንቃቄ ሲባል በለይቶ ማቆያ ክትትል እየተደረገላቸው ይገኛሉም ብሏል ይህበእንዲህ እንዳለ ጠቅላይ ሚንስትር አብይ አህመድ ህብረተሰቡ አካላዊ ርቀትን እንዲጠብቅ ማድረግ  አዳጋች እንደሆነባቸው ተናገሩ፡፡

በዛሬው እለት ጠቅላይ ሚኒስትር አብይ አህመድ ኮቪድ 19ኝን ለመከላከል ከተቋቋመው የሚንስትሮች ኮሚቴ ጋር በኢንተርኔት ውይይት አድርገዋል በውይይታቸውም ኮሚቴው ባቀረበው ሪፖርት መሰረት ዋናው እና ፈታኝ ሁኔታ አካላዊ ርቀትን መጠበቅ መሆኑን ሪፖርቱ ማመላከቱን ጠቅላይ ሚንስትሩ ተናግረዋል፡፡

በመሆኑም በሚቀጥሉት ሁለት እና ሶስት ሳምንታት ቫይረሱ ሊያስከትለው የሚችለው ጉዳት የሚታይበት ጊዜ በመሆኑ በርካታ ሰዎች የሚሰባሰቡበት እንደ ገበያ ስፍራዎች እና የትራንስፖርት መገልገያዎች ላይ ህብረተሰቡ አካላዊ ርቀቱን እንዲጠብቅ ጠቅላይ ሚንስትር አብይ አህመድ አሳስበዋል፡፡