አባይ ሚዲያ ሚያዝያ 19፤2012

ባለፈው ቅዳሜ በነበረው ዘገባችን በቤሩት ሊባኖስ የሚገኙ ኢትዮጵያውያን በኮቪድ 19 ወረርሽኝና በአገሪቱ የፖለቲካና የኢኮኖሚ ቀውስ ምክንያት በስራ አጥነትና በርሃብ እየተሰቃዩ እንደሆነ መግለጻቸውን ዘግበን ነበር በሊባኖስ የምትኖር አንዲት ኢትዮጵያዊትም ‹‹በሊባኖስ ችግሩ የጀመረው አሁን አይደለም፤በተጨማሪም የፖለቲካና የኢኮኖሚ ቀውስ ስለነበረ ለሰባት ወር ያህል ስራችንን አጥተናል ፤የምንበላው የምንቀምሰው የለንም መንግሰት ከዚህ ያስወጣን ›› ብላለች፡፡

ሌላኛዋ አስተያየት ሰጪ ደግሞ ‹‹አዚህ የምንኖር የመኖሪያ ፍቃድ ያለንም ሆነ የሌለን ለመውጣት ገንዘብ ከፍለን ብንመዘገብም መውጣት አልቻልንም፤እኛን ከኮቪድ 19 ወረርሽኝ ይልቅ ረሃቡ እየጎዳን ነው ፡፡›› ስትል ትገልጻለች ከአስተያየት ሰጪዎቹ መሃከል ህጻናት ያሏቸውም የሚገኙበት ሲሆን፣አሰሪዎቻቸውም ይህን ችግር ከግምት ውስጥ ሳያስገቡ እያባረሯቸው እንደሆነ ገልጸዋል፡፡

በዛሬው ዕለት የወጣው ዘገባ ደግሞ በሊባኖስ የ100 ኢትዮጵያውያን አስከሬን በማድረቂያ ውስጥ ሲሆን ከ80 በላይ የሚሆኑት ደግሞ በአእምሮ ህመም እየተሰቃዩ እንደሆነ ይገልጻል በሊባኖስ መዲና ቤሩት ከተማ የሚገኙ ኢትዮጵያዊያን ስደተኞች ላለፉት ሰባት ወራት ካለ ስራ መቀመጣቸውንና ከባድ ችግር ውስጥ መግባታቸውን ተናግረዋል፡፡

እነሱ እንደሚሉት በሃገሪቷ ስራ የጠፋው የሃገሪቷ ዜጎችም ሰራተኞቻቸውን ማሰናበት የጀመሩት ከሰባት ወራት በፊት ባጋጠማቸው የኢኮኖሚ ችግር ምክንያት ነው በወቅቱም በሁኔታው ተስፋ ቆርጠው ወደ ሃገራቸው ለመመለስ በኢትዮጵያ ቆንስላ በኩል የተጠየቁትን 550 ዶላር ከፍለው የተወሰኑት ሃገራቸው መግባታቸውን ገልጸዋል፡፡

ቀሪዎቹ ደግሞ ተራቸውን እየጠበቁ ባለበት ሁኔታ ኮሮና ቫይረስ በመከሰቱ ወደ ኢትዮጲያ የመመለሻቸው ነገር እየራቀባቸው መምጣቱን ይናገራሉ ስደተኞቹ ባጋጠማቸው የገንዘብ ችግር ምክንያት በርካቶች ከተከራዩበት ቤት እንዲወጡ እየተደረጉ መሆኑንና በዚህም ራሳቸውን የሚያጠፉ፤እንዲሁም ለአእምሮ ህመም የሚዳረጉ ዜጎቻችን ቁጥር እየጨመረ መምጣቱን ተናግረዋል፡፡

በሊባኖስ የኢትዮጵያ ቆንስላ እንዳለው ከ80 በላይ ልጆች አእምሮ በሽተኛ ሆነው ኤምባሲው ውስጥ አሉ ወደ 100 የሚጠጉ ልጆች ደግሞ ህይወታቸው አልፎ አስከሬናቸው ማድረቂያ ውስጥ እንዳለም እናውቃለን ብለዋል እናም መንግስት የሚችለውን አድርጎ ወደ ሃገራችን ያስገባን ሲሉ ነው ድምጻቸውን ያሰሙት፡፡

በውጪ ጉዳይ ሚኒስትር የቆንስላ ጉዳዮች ዳይሬክተር ጄኔራል አቶ ዬሃንስ ሾዴ ከስደተኞቹ የተነሳው አቤቱታ ትክክል መሆኑን በማመን፤ይህ በሊባኖስ ብቻ ሳይሆን በሁሉም መካከለኛው ምስራቅና ሌሎችም በርካታ ሃገራት ያሉ ዜቻችን ጥያቄ ነው ብለዋል ሆኖም ሃገራት በኮቪድ-19 ወረርሽኝ ስጋት ምክንያት አለም አቀፍ በረራዎችን በማገዳቸው የኢትዮጵያ አየር መንገድ የአየር ክልላቸውን ጥሶ መግባት አይችልም ይላሉ በመሆኑም ሁኔታዎች ወደ ቦታዎች እስከሚመለሱ ድረስ በሁሉም አቅጣጫ ያሉ ኢትዮጵያዊያን ራሳቸውን እየጠበቁ በትእግስት ይህን ጊዜ እንዲያሳልፉት ጥሪ አቅርበዋል፡፡