አባይ ሚዲያ ግንቦት 04፤2012

በዋልታ እና ፋና የቴሊቪዥን ጣቢያዎች በጋራ እና በአንድ ሰው ሽርክና የተቋቋመው ዋፋ ማርኬቲንግና ፕሮሞሽን ኃላፊነቱ የተወሰነ የግል ማኅበር ውስጥ ብልሹ አሠራሮች መኖራቸውን ውስጥ አዋቂ ምንጮች አስታውቀዋል በድርጅቱ አሠራር ውጪ ተደረጉ ከተባሉት አንደኛው መጋቢት 1 ቀን 2012 በተጻፈ ደብዳቤ የዋፋ ሥራ አስኪያጅ 284 ሺሕ ብር ከድርጅቱ በመበደር ወደ አገር ውስጥ ለሚያስገቡት እና በራሳቸው ሥም ለገዟቸው ቴሌቪዥኖች ቀረጥ ከፍለው ማውጫ እንዳደረጉ በተጨማሪም  በድርጅቱ የአሠራር ደንብ መሠረት አንድ ሠራተኛ መበደር የሚችለው  ትልቁ እርከን የኹለት ወር ደሞዝ እንደሆነ እና በሥራ አስኪያጇ የተጠየቀው ገንዘብም ከሕጋዊነት የራቀ እንደሆነ ተያይዞ ተጠቅሷል።

ይህን በሚመለከት ዋና ሥራ አስኪያጅ ፋንታየ ጌታነህ  በሰጡት ምላሽ፣ የተባለው ነገር ሐሰት እንደሆነና መበደርም ቢያስፈልግ ካላቸው የባለቤትነት ድርሻ በመነሳት መበደር እንደሚችሉ አስታውቀዋል ከዚሁ ጋር ተያይዞ በድርጅቱ የአስተዳደር ኃላፊ በሆኑት አቶ ኃይሌ ትኩዕ በተባሉ ግለሰብ ስምንት ጥቅል እቃዎች ግዢ እንዲፈጸምባቸው የሚጠይቅ ደብዳቤ ለዋና ሥራ አስኪያጇ በመጋቢት 2 ቀን 2012 ደብዳቤ ጽፈው ጥያቄ ያቀርባሉ።

በዋና ሥራ አስኪያጇ በኩልም ግዢው እንዲካሄድ ፈቃድ የተሰጠበት ቢሆንም፣ እቃዎቹ በድብቅ ገብተው መጋዘን እንዲከማቹ እንደተደረጉ እና የግዢው ሂደት ግን አሁንም የዋጋ መጠይቅ ተይዞ እየተካሄደ እንደሆነ ምንጮች ተናግረዋል ስራ አስኪያጇ በሰጡት ምላሽ፣ የተነሳው መሠረተ ቢስ ክስ እና ከግል ቂም የመነጨ  እንደሆነና በተለያዩ ጊዜያት ማስፈራሪያዎች እና ዛቻዎች በአካል እና በጽሑፍ እንደሚደርሷቸውም ጨምረው ገልጸዋል ዛቻ ያዘለ ባለ ኹለት ገጽ ጽሑፍ በሥራ አስኪያጇ ቢሮ ለማየት ተችሏል።

በሌላ በኩል ደግሞ ጠቅላይ ሚኒስትር ዐቢይ አሕመድ ወደ ዱባይ ባቀኑበት ወቅት የባህል ቡድኑን ይዘው እንዲሄዱ ለዋፋ ጥያቄ በቀረበበት ወቅት፣ ከብሔራዊ ቴያትር ሠራተኞች ይዘው መሄዳቸው ተጠቅሶ፤ በባህል ቡድኑ እያንዳንዱ አባል በነፍስ ወከፍ 30 ኪሎ ግራም ቂቤ ወደ ዱባይ እንዲያጓጉዙ በማድረግ እና ዱባይ ላለ ተቀባይ መድረሳቸውን ጥቆማዎች አመላክተዋል።

ስራ አስኪያጇም ለዚህም ምላሽ ሲሰጡ የተደረገው ዱባይ የሚገኘው አል ሐበሻ ምግብ ቤት ከባህል ቡድኑ ኹለት ሰዎች ኹለት ወይም ሦስት ኪሎ ቂቤ እንዲያመጡላቸው በጠየቁት መሰረት እንደተወሰደላቸው ነው እናም ይህ ዓይነት የሐሰት ውንጀላ የመጣው የባህል ቡድኑ ያልተገባ ጥቅም ለማግኘት አስበው ስለተከለከሉ ያቀረቡት ውንጀላ እንደሆነም ጠቁመዋል።

በሦስተኛ ደረጃ ደግሞ በጥር 2012 በጣሊያን እና ፈረንሳይ በተደረጉ የንግድ እና ኢንቨስትመንት ፎረሞች ለአስጎብኚ፣ ለሆቴል ማስያዝ እና ለትራንስፖርት በሚል ሰበብ 12 ሺሕ ዩሮ ‹‹ጊዮን ኢንተርናሽናል ኤኬ›› ለተባለ ድርጅት እንዲተላለፍ መደረጉን ተገልጿል ስራ አስኪያጇ ምላሽ ሲሰጡ ድርጅቶች የሚመረጡት ዝግጅቱ በሚካሄድበት አገር በሚገኙ የኢትዮጵያ ኤምባሲዎች እንደሆነና የተከፈለው ክፍያ ትንሽ እንደሆነና ዝግጅቱን ሙሉ በሙሉ ያዘጋጀውና ሆቴል እና ከአገር ወደ አገር ሲጓጓዝ የተካሄደውን ሙሉ ትራንስፖርት ያቀረበው ይኸው ድርጅት ነበር ብለዋል ስትል አዲስ ማለዳ ዘግባለች፡፡