አባይ ሚዲያ ግንቦት 12፤2012

ኢትዮጵያ ከ10 ዓመት በላይ ለኤርትራውያን ስደተኞች ስትሰጥ የነበረውን የቡድን ጥገኝነት ማቆሟን ተከትሎ የጥገኝነት ፖሊሲ እና ስነ ስርአቷ ላይ ለውጥ አድርጋ እንደሆነ በግልፅ እንድታስታውቅ የተባበሩት መንግስታት ድርጅት ጠይቋል ጥያቄውን ለኢትዮጵያ መንግስት ያቀረበው በኤርትራ ያለውን የሰብአዊ መብት አያያዝ እንዲከታተል በተባበሩት መንግስታት የሰብአዊ መብት ኮሚሽን ስር የተቋቋመው ልዩ ራፖርተር ጽህፈት ቤት ነው።

የኤርትራን ጉዳይ የሚከታተሉት ልዩ ራፖርተር ዳንኤላ ካራቬትዝ ከሶስት ሳምንት በፊት ለኢትዮጵያ ውጭ ጉዳይ ሚኒስትር አቶ ገዱ አንዳርጋቸው በላኩት ደብዳቤ፤ ኢትዮጵያ ለኤርትራዊያን ስደተኞች ስትሰጥ የነበረውን ጥገኝነት የሚመራበትን ስነ ስርአት እና ፖሊሲ፤ ከጥር 2012 ዓ.ም. መጨረሻ ጀምሮ በተግባር መቀየሯን መረዳታቸውን ገልጸዋል ኢትዮጵያ የተከተለችው ይህ አካሄድም እንዳሳሰባቸው ጠቁመዋል።

በሚያዚያ 21፤ 2012 ዓ.ም የተፃፈው ደብዳቤ ኢትዮጵያ ለኤርትራውያን ስደተኞች ስታደርግ የቆየችውን እገዛ በበጎ መልኩ ያነሳል የኤርትራን የሰብዓዊ መብት ጉዳዮች እንዲከታተሉ በጥቅምት 2011 የተመደቡት ቺሊዊቷ ልዩ ራፖርተር ከዚህ ቀደም በኢትዮጵያ ስላለው ለውጥ በጎ ጎኖች ለተባበሩት መንግስታት የሰብአዊ መብት ኮሚሽን ምክር ቤት መግለፃቸውን በደብዳቤያቸው አስታውሰዋል።

ነገር ግን በቅርቡ የታዩት አካሄዶች “ኢትዮጵያ አዲስ ባፀደቀችው የስደተኞች አዋጅ እና የኤርትራዊያን ስደተኞችን መብት በማክበር ያሳየቻቸውን ለውጦች የሚቀንስ ነው” ብለዋል“ኢትዮጵያ ለኤርትራዊያን ስደተኞች ለረጅም ጊዜ በሯን ክፍት ማድረጓን እና በኤርትራውያን ስደተኞች ዘንድም እንደ አስተማማኝ መሸሸጊያ የተወሰደች አገር ሆና መቆየቷን ሳላደንቅ አላልፍም” ሲሉ ልዩ ራፖርተሯ በደብዳቤያቸው ላይ አስፍረዋል።

“ከጥቂት ወራት ወዲህ የተከሰቱት ለውጦች ግን በተለይም ተጋላጭ የህብረተሰብ ክፍሎችን አደጋ ላይ ጥሏል” ብለዋል“ላቅ ላለ አደጋ ተጋልጠዋል” በሚል በደብዳቤው የተጠቀሱት ከቤተሰቦቻቸው የተጠፋፉና ለብቻቸው የተሰደዱ ህፃናት እና ታዳጊዎች እንዲሁም የህክምና እርዳታ የሚሹ ስደተኞች ናቸው።

የእነዚህ ስደተኞች ሁኔታ ኢትዮጵያ አለም አቀፍ መለኪያዎችን ከግምት ውስጥ በማስገባት፣ የጥገኝነት ስነ-ስርአት እና ፖሊሲዋን የተመለከተ ግልፅ መመሪያ በማውጣት፣ ይፋ እንድታደርግ ለመጠየቅ ምክንያት እንደሆነ ዳንኤላ አብራርተዋል በመስክ ላይ ለሚገኙ ሰራተኞችም ግልፅ የሆነ የስራ መመሪያ እንዲሰጣቸውም ጥያቄ አቅርበዋል የልዩ ራፖርተሯ ደብዳቤ ከኤርትራ ወደ ኢትዮጵያ የሚገቡ አዳዲስ ስደተኞች የጥገኝነት ምዝገባ እንደማይደረግላቸው እና በአፋር እንዲሁም በትግራይ ክልል ባሉ መጠለያዎች መሰረታዊ አገልግሎቶች እያገኙ አለመሆኑን ያስረዳል።

“በእንዳባጉና እና አሳይታ የስደተኛ መጠለያ ካምፖች የሚገኙ የኢትዮጵያ የስደተኞች ኤጀንሲ ሰራተኞች ኤርትራውያን ስደተኞች የሚያቀርቡትን የጥገኝነት ምዝገባ ጥያቄ አይቀበሉም፤ ወደ ኤርትራ እንዲመለሱም ነግረዋቸዋል” ሲሉ ልዩ ራፖርተሯ በደብዳቤያቸው ወቅስዋል ልዩ ራፖርተሯ የኮሮና ቀውስ እስኪፈታ ድረስ ስደተኞችን የማዘዋወር ስራው እንዲቆምም ተማጽኗቸውን አቅርበዋል።