አባይ ሚዲያ ግንቦት 12፤2012

የሱዳኑ ጠቅላይ ሚኒስትር አብደላ ሀምዶክ የአባይ ውሃ አጠቃቀም ድርድርን በተመለከተ ከጠቅላይ ሚኒስትር አብይ አህመድ ጋር ያደርጉታል ተብሎ የሚጠበቀው ውይይት ኢትዮጵያ በአሜሪካ እና ዓለም ባንክ አሸማጋይነት ወደሚደረገው ድርድር እንድትመለስ የማግባባት አላማ ያለው ነው ተብሏል የታችኞቹ የአባይ ተፋሰስ አገራት የሆኑትን ግብጽ እና ሱዳንን ባሳተፈው ድርድር ላይ ስትካፈል የቆየችው ኢትዮጵያ “ከአሜሪካ በኩል ጫና እየደረሰብኝ” በማለት ከባለፈው የካቲት ጀምሮ ራሷን አግላለች።

ኢትዮጵያ ከድርድሩ ብትቀርም  በአባይ ወንዝ ላይ እያስገነባች የሚገኘውን የህዳሴ ግድብ የመጀመሪያ ደረጃ የውሃ ሙሌት በመጪው ሐምሌ ወር ለመጀመር ቁርጠኛ መሆኗን በተደጋጋሚ ገልጻለች የሱዳኑ ጠቅላይ ሚኒስትር የግድቡን የመጀመሪያ ደረጃ ውሃ ሙሌት በተመለከት ኢትዮጵያ ያሰናዳችውን የስምምነት ረቂቅ  እንደማይቀበሉ ባለፈው ሳምንት ቢገልጹም ከኢትዮጵያ አቻቸው ጋር የመወያየት ዕቅድ እንዳላቸው ግን የሱዳን መንግሥት  ባወጣው መግለጫ አስታውቋል።

ሀምዶክ ከጠቅላይ ሚኒስትር አብይ ጋር የሚወያዩት “የሶስትዮሽ ድርድሩ በአፋጣኝ እንዲጀመር ለማሳሰብ” እንደሆነ መግለጫው ጠቁሟል የሱዳን እና የግብጽ ከፍተኛ ባለስልጣናት በጉዳዩ ላይ  መምከራቸውም በመግለጫው ተጠቅሷል። በቪዲዮ የተካሔደውን የሁለቱ ሀገሮች ውይይት የሱዳኑ ጠቅላይ ሚኒስትር እና የግብፁ አቻቸው ሙስጠፋ ማዶብሊ መርተውታል። በውይይቱ ላይ የየሀገራቱ የውጭ ጉዳይ ሚኒስትሮች እና የስለላ ተቋማት ኃላፊዎችም ተሳትፈዋል።

ውይይቱ የተደረገው ሶስቱ ሀገራት በህዳሴ ግድብ የውኃ አሞላል እና አሰራር ላይ ያሏቸውን ልዩነቶች መፍታት የሚያስችላቸውን ድርድር እንዲቀጥሉ ለማድረግ ታቅዶ እንደሆነ የሱዳን መንግስት መግለጫ አትቷል በሱዳን የሚኒስትሮች ምክር ቤት ድረ ገጽ ይፋ የሆነው ይህ መግለጫ “በውይይቱ ላይ የኢትዮጵያ፣ የሱዳን እና የግብፅን ጥቅሞች እውቅና ከሚሰጥ አንዳች ሥምምነት መድረስ እንደሚያስፈልግ ሁለቱ ወገኖች አጽንኦት ሰጥተዋል” ብሏል።

ከሶስት ቀናት በፊት ወደ ኢትዮጵያ መጥቶ የነበረው የሱዳን ከፍተኛ የልዑካን ቡድን ከጠቅላይ ሚኒስትር አብይ ጋር ከተነጋገረባቸው ዋና ዋና ጉዳዮች መካከል የታላቁ ሕዳሴ ግድብ ጉዳይ  አንዱ እንደነበር  ተገልጿል የልዑካን ቡድኑ የተመራው በሱዳን የካቢኔ ጉዳዮች ሚኒስትር አምባሳደር ዑመር ባሕር ማኔስ ነበር የዛሬው የሱዳን መንግስት መግለጫ “የሶስቱ ሀገራት  ድርድር በዋሽንግተን ዲሲው ስምምነት መሰረት መቀጠል አለበት” ቢልም ኢትዮጵያ ግን ከዚህ የተለየ አቋም ማራመድ ከጀመረች ሰነባብታለች። የኢትዮጵያ የውኃ፣ መስኖ እና ኢነርጂ ሚኒስትር ስለሺ በቀለ አገራቸው ወደ ዋሽንግተኑ ድርድር ፊቷን የማዞር ሐሳብ እንደሌላት በቅርቡ ማረጋገጫ ሰጥተዋል።

የሱዳኑ ጠ/ሚ አብደላ ሀምዶክ ከጠ/ሚ ዐቢይ ጋር ውይይት እንደሚያደርጉ ከኢትዮጵያ መንግስት በኩል እስካሁን የተሰጠ ፍንጭ የለም ያም ቢሆን ኢትዮጵያ ትላንትና ዛሬ  በተለያዩ የአፍሪካ፤ የኤዥያና የመካከለኛው ምስራቅ ሀገራት መቀመጫቸውን ላደረጉ አምባሳደሮችና ዲፕሎማቶች ስለግድቡ ገለጻ ማድረጓን ቀጥላላች፡፡