አባይ ሚዲያ ግንቦት 13፤2012

በዛሬው እለት የሕገ መንግስት ጉዳዮች አጣሪ ጉባኤ ከጤና ሚኒስቴር እና ከኢትዮጵያ ብሄራዊ ምርጫ ቦርድ የሚቀርበውን የባለሞያዎች ማብራሪያን አድምጧል ነሐሴ 23/2012 ዓ.ም 6ኛውን ሀገራዊ ምርጫ ለማካሄድ እየተዘጋጀ የነበረው የኢትዮጵያ ብሔራዊ ምርጫ ቦርድ ስለተራዘመው ምርጫ አሁናዊና ቀጣይ ዝግጅቶች ለሕገ መንግሥት አጣሪ ጉባኤ ማብራሪያ ሰጥቷል፡፡

በአንድ የምርጫ ጣቢያ 1 ሺህ 500 ሰዎችን፣ በአጠቃላይ በመላው ኢትዮጵያ ደግሞ ከ50 ሚሊዮን በላይ መራጮችን ለማሳተፍ በዝግጅት ላይ እንደነበር ቦርዱ ለሕገ መንግሥት አጣሪ ጉባኤ በምክትል ሰብሳቢው አቶ ውብሸት አየለ አማካኝነት አብራርቷል ለ50 ሺህ የምርጫ ጣብያዎች የሚሆኑ ቁሳቁስ ማዘጋጀት፣ የምርጫ ሰነዶችን በተለያዩ ቋንቋዎች ማዘጋጀት፣ የምርጫ ክልሎችን ካርታ አዘጋጅቶ ማሳወቅና ሌሎችም ከቦርዱ ከሚጠበቁ ተግባራት መካከል ተጠቃሽ ናቸው፡፡

እንደ አቶ ውብሸት ማብራሪያ የምርጫ ትምህርት በአምስት የሀገር ውስጥ ቋንቋዎች ማዘጋጀትና የፖለቲካ ፓርቲዎች በአዲስ እንዲመዘገቡ ማድረግም የቦርዱ ወቅታዊ ሥራዎች ነበሩ ነገር ግን ከመጋቢት 7/2012 ዓ.ም ጀምሮ የኮሮና ወረርሽኝን ለመቆጣጠር ክልከላዎች መጀመራቸው ሥራውን በአግባቡ ለመከወን እንዳላስቻለ ነው ቦርዱ ያስታወቀው፡፡

ይህንን ተከትሎም ቦርዱ ሁኔታውን ማጥናቱንና በጥናቱ ውጤት መሠረትም ክልከላው ከ14 ቀናት በላይ ከቀጠለ ምርጫውን በወቅቱ ለማካሄድ እንደማይችል ማሳወቁን አስታውሷል በውሳኔ ሐሳቡም ወረርሽኙ መወገዱ በጤና ባለሙያዎች ተረጋግጦ ሲገለጽ እንደገና ሥራዎቹን በማስኬድ ምርጫ ማካሄድ እንደሚቻል አሳውቋል፡፡

በኦንላይን ወይም በፖስታ ቤት በኩል ድምጽ ለማሰጠት መሞከር የሚያስኬዱ አለመሆኑንም ቦርዱ ማጤኑን አስታውቋል ቦርዱ የወደፊት የምርጫ ሁኔታን በተመለከተ ግምቶችን መነሻ አድርጎ ባደረገው የሁኔታ ትንተናዎችም የምርጫ ሂደቱ ሊዘገይ፣ የቁሳቁስ ዋጋ ሊጨምር፣ የገንዘብ እጥረት ሊያጋጥም፣ ከዓለማቀፍ አጋር አካላት ዕርዳታ ላይገኝ ይችላል፤ ከምርጫ ጋር የተያያዙ ስጋቶችም ሊኖሩ ይችላሉ የሚሉት ተመላክተዋል፡፡

አካላዊ ርቀትን መጠበቅ ሊቀጥልና የአካል ደኅንነት መጠበቂያ ቁሳቁስም ሊያስፈልግም እንደሚችል፣ የምርጫ ሕግ ማሻሻል ሊያስከትል እንደሚችልም በትንተናው ተመላክቷል ከዚህ በመነሳት ቦርዱ ሁለት የጊዜ ሰሌዳ ማዘጋጀቱን ምክትል ሰብሳቢው አብራርተዋል የመንግሥት መሥሪያ ቤቶች ትኩረታቸውን ሙሉ በሙሉ ለኮሮና ምላሽ መስጠት ላይ ሊያደርጉ እንደሚችሉም አስረድተዋል፡፡

የኢትዮጵያ ብሔራዊ ምርጫ ቦርድ ምርጫውን ለማካሄድ እስከ 13 ወራት ጊዜ ሊወስድበት እንደሚችልና ተጨማሪ ከ2 ቢሊዮን 512 ሚሊዮን በላይ ብር እንደሚስፈልገው አስታውቋል ይህም አጠቃላይ የቦርዱን ወጪ ከ8 ቢሊዮን ብር በላይ እንደሚያደርሰው ተመላክቷል የቦርዱ ሰብሳቢ ብርቱካን ሚደቅሳ ከሕገ መንግሥት አጣሪ ጉባኤ አባላት እየቀረቡ ላሉ ጥያቄዎች ማብራሪያ ሰጥተዋል፡፡