አቶ ሙስጠፌ ሙሀመድ ስለ ግንቦት 20

ግንቦት 20 ለሶማሌ ክልል ህዝብ በቋንቋው ከመማርና ራስን በራስ ከማስተዳደር መብት ካስገኘለት ጥቅም ይልቅ ከፍተኛ የሆነ የሰብዓዊ መብት ጥሰትና የፀጥታ ችግር በመፍጠር መጥፎ አሻራ ማሳረፉን የክልሉ ምክትል ርዕሰ መስተዳድር ገልጸዋል አቶ ሙስጠፌ ሙሀመድ እንደገለፁት፤ በግንቦት 20 በአገር አቀፍ ደረጃ የፌዴራል ሥርዓት ተግባራዊ መደረጉን ተከትሎ የሱማሌ ክልል ህዝብ በቋንቋው የመማር፣ ራስን በራስ የማስተዳደር መብት ያገኘበት ቢሆንም የክልሉ ህዝብ በዚህ በኩል ካገኘው ጥቅም ይልቅ በሰብዓዊ መብት ጥሰት፣ በውሸት ፌዴራሊዝምና እና በሀብት ዘረፋ ከደረሰበት የከፋ በደል የተነሳ ከጥቅሙ ይልቅ ጉዳቱ ያመዝናል፡፡

በግንቦት 20 ምክንያት በአገር አቀፍ ደረጃ በመጡ አንዳንድ ለውጦች የሱማሌ ክልል ሕዝብ የተጠቀመበት ሁኔታ መኖሩን አውስተው፤ በሕውሓት የተመራው ሥርዓት በሶማሌ ሕዝብ ላይ ከፍተኛ የሆነ ሥነ ልቦናዊ የሰብዓዊ መብት ጥሰት መጥፎ አሻራ ማሳረፉን ተከትሎ ከሥርዓቱ ጥቅም ይልቅ ጉዳቱ የሚያመዝን መሆኑን አመልክተዋል፡፡

ሕወሓት የሚመራው ሥርዓት በአገር አቀፍ ደረጃ ሲያራምድ የነበረው ህዝብን ከህዝብ የማናከስና የጥላቻ ፖለቲካ እንደነበር አመልክተው “ሥርዓቱ በሱማሌ ህዝብ ላይ በታሪኩ ተፈፅሞበት የማያውቀው ግፍ፣ ግድያ፣ ማንገላታት አድርሶበታል፤ በተደራጀ መልኩ ህባችንን የማወራድ ሥራ ተሠርቷል” ብለዋል ።

“የሶማሌ ክልል አሁን ባለው ለውጥ ደስተኛ ነው” ያሉት ፕሬዚዳንቱ፤ የክልሉን ሰላም ለማደፍረስ በኮንትሮባዲስቶችና በእነሱ ኔት ወርኮችና ተጠቃሚዎች አማካኝነት የሚሞከሩ አፍራሽ ሥራዎች ቢኖሩም የክልሉ ተቋማት በተካሄዱት የሪፎርም ሥራዎች ጠንካራ በመሆናቸው፤ ችግሮቹን አስተማማኝ በሆነ መልኩ መመከት የሚያስችል አቅም መፍጠራቸውን ተናግረዋል።

ልማትንም በተመለከተ በለውጡ ወቅት የተሰሩት የልማት ሥራዎች በ27 ዓመታት ከተሠሩ ሥራዎች እንደሚበልጡ አውስተው፤ በክልሉ ቀደም ሲል በአምስት ዓመት ሰባት ሁለተኛ ደረጃ ትምህርት ቤቶች ሲሰሩ፤ ከለውጡ በኋላ ባለው አንድ ዓመት ከመንፈቅ በሚሆን ጊዜ ውስጥ 50 ሁለተኛ ደረጃ ትምህርት ቤቶች መገንባታቸውን ለአብነትም ጠቅሰዋል።

ክልሉ ስድስት ቢሊዮን ብር በላይ በመመደብ የተለያዩ የልማት ሥራዎችን እያካሄደ እንደሚገኘ ገልፀው፤ በጎዴ፣ በቀብሪ ደሃርና በደገሐቡር ከተሞች በሁለት ቢሊዮን ብር በላይ ወጪ የመጠጥ ውሃ ፕሮጀክቶች እየተገነቡ እንደሚገኙ ገልፀዋል ማንኛውም ሥርዓት ጠንካራና ደካማ ጎን እንዳለው ገልፀው፤ ደካማውን ማረም ጠንካሬውን ማስቀጠል እንደሚገባም አስገዝበዋል።