አባይ ሚዲያ ግንቦት 20፤2012

በምዕራብ ኦሮሚያ በሚገኙ አራት ዞኖች በተለይም በምዕራብ ወለጋ እና ቄለም ወለጋ ዞኖች ውስጥ ‘በመንግሥት ጸጥታ አስከባሪ ኃይሎች ግድያዎች እየተፈጸሙ ነው’ የሚሉ ተደጋጋሚ እሮሮዎች ከነዋሪዎች ይሰማል ከእነዚህ መካከል በምዕራብ ወለጋ ዞን ላሎ አሰቢ ወረዳ ኬሌዬ ቢርቢር በምትሰኝ ቀበሌ ውስጥ ተገደሉ የተባሉት የአራት ልጆች እናት ይገኙበታል።

ወ/ሮ አምሳሉ ጉደታ የአራት ልጆች እናት ሲሆኑ ሐሙስ ግንቦት 13 2012 በእርሻ ሥራቸው ላይ ሳሉ በመንግሥት ጸጥታ አስከባሪ ኃይሎች በጥይት ተመትተው መገደላቸውን ባለቤታቸው አቶ ሚረቴ ኢማና ይናገራሉ በተመሳሳይ መልኩ በምዕራብ ወለጋ ዞን የገንጂ ወረዳ ነዋሪ የነበረው ወጣት ለሊሳ ተፈሪ ከሁለት ሳምንት በፊት በአካባቢው ተሰማርቶ በሚገኘው የመንግሥት ኃይል በቁጥጥር ሥር ከዋለ ከሁለት ቀናት በኋላ ሞቶ መገኘቱን ቤተሰቦቻቸው መናገራቸውን መዘገባችን ይታወሳል።

በአከባቢው ‘የሸኔ አባላት ጋር ግንኙነት አላቸው ወይም ደጋፊ ናቸው” የሚባሉ ሰዎች ለእስር እየተዳረጉም እንደሆነ የአካባቢው ነዋሪዎች ይናገራሉ የኦሮሚያ ክልል የአስተዳደር እና ጸጥታ ቢሮ ኃላፊ አቶ ጅብሪል ሞሐመድ ለቢቢሲ እንደተናገሩት በመንግሥት የጸጥታ አስከባሪዎች ላይ የሚቀርበው አቤቱታ ሐሰት ነው። ይህ ክስ መሠረተ ቢስ ነው ይላሉ።

“ጸረ-ሰላም ኃይሎች ራሳቸው ገድለው መንግሥት ላይ ማሳበባቸው የተለመደ ነው” ያሉት አቶ ጅብሪል፤ “እኛ ሰላማዊ ዜጋ ገድለን አናውቅም፤ የጸጥታ መዋቅሩም ሰላማዊ ሰው አይገድልም። ለሚሞቱ ሰዎች መነሻውም መጨረሻውም ሸኔ ነው” ይላሉ የአስተዳደር እና ጸጥታ ቢሮ ኃላፊው ለግድያዎቹ ሸኔን ተጠያቂ የሚያደርጉበትን ምክንያት ሲያስረዱ፤ ሰላማዊ ትግል ‘አንቀበልም’ በማለት የደህንነት ችግር ፈጥረው ህዝብ ወደ ሚኖርበት ገብተው፣ ወደ ጸጥታ አስከባሪዎች ይተኩሳሉ” ብለዋል።

አቶ ጅብሪል በመንግሥት ኃይሎች እና በታጣቂዎች መካከል በሚደረጉ የተኩስ ልውውጦች ንጹሃን ዜጎች እየተጎዱ እንደሆነ ያረጋገጣሉ “ከዚህ ቀደም እኔ በነበርኩበት ቦታ ተኩስ ከፍተው፤ የሸኔ ኃይል እየተንቀሳቀስ እያየን፤ ህጻናት፣ ሴቶች እና አዛውንቶች መካከል በመግባታቸው መምታት እየቻልን፤ ተኩስ እንዲቆም አስደርጊያለሁ” ይላሉ አቶ ጅብሪል።

አቶ ሚረቴ እንደሚሉት ባለቤታቸው የበቆሎ ማሳ ውስጥ እያለች በተተኮሰባቸው ጥይት ተመተው ህይወታቸው አልፏል “የአንድ ዓመት ህጻን የእናቷ አስክሬን አጠገብ ቁጭ ብላ እንዳለች ነው የባለቤቴን አስክሬን ያነሳሁት” በማለት በሃዘን ተውጠው ይናገራሉ አቶ ሚረቴ እንደሚሉት ከሆነ ከባለቤታቸው ግድያ አንድ ሳምንት በፊት፤ እርሳቸውም በመንግሥት ጸጥታ አስከባሪ ኃይሎች ‘ሸኔ ያለበትን ቦታ ታውቃለህ በሚል ድብደባ ተፈጽሞባቸዋል።

ከዚህ ቀደም በአካባቢው በመንግሥት እና ታጣቂዎች መካከል ግጭት ይከሰት እንደነበረ አስታውቀው፤ ባለቤታቸው በተገደለችበት ወቅት ግን በአካባቢያቸው ምንም አይነት ግጭት እንዳልነበረ ተናግረዋል “እሷ ለመግደል ታስቦ ነው የተተኮሰባት” ይላሉ በባለቤታቸው ግድያ ተጠርጥሮ የተያዘም ሆነ የባለቤታቸውን ግድያ ለመመርመር የመጣ የመንግሥት አካል እንደሌለ አቶ ሚረቴ ለቢቢሲ ተናግረዋል።