አባይ ሚዲያ ግንቦት 29፤2012

ብረታ ብረትና ኢንጂነሪንግ ኮርፖሬሽን የሰራተኞቹን ቁጥር በከፍተኛ ደረጃ የሚቀንስ አዲስ አደረጃጀት እያዘጋጀ ነው በስራቸው ያለመቀጠል ስጋት ያደረባቸው ሰራተኞቹ ለተቃውሞ እየተዘጋጁ ነው የመከላከያ ምርቶችን ከሚያመርቱ ፋብሪካዎች ተለይቶ ዘጠኝ ፈብሪካዎችን በስሩ ይዞ የተደራጀው የብረታ ብረትና ኢንጂነሪንግ ኮርፖሬሽን በስሩ ዘጠኝ ሺህ የሚሆኑ ሰራተኞችን አቅፎ ይዟል።

ሆኖም ኮርፖሬሽኑ አዲስ ያወጣው የሰራተኛ ፍላጎት መዋቅር ብዙዎችን ከስራ ገበታ የሚያፈናቅል ነው የሚል ቅሬታ ቀርቦበታል በኮርፖሬሽኑ ሰራተኞች ለኮርፖሬሽኑ ዋና ዳይሬክተር የገባ የቅሬታ ደብዳቤ አዲሱ የኮርፖሬሽኑ የሰራተኛ ፍላጎት መዋቅር ፣ የሰራተኛውን ጥቅምና መብትን የማያስከብር ፣ ነባራዊ ሁኔታን ያላገናዘበ ፣ የአሰሪና ሰራተኛ አዋጁን ያልተከተለ እንዲሁም መነሻውና ግቡ ግልጽ ያልሆነ ነው በሚል ትችት ያቀርባል።

የሰራተኞቹ ደብዳቤ በተጨማሪም የኮርፖሬሽኑ ሰራተኞች ቀድሞ በነበሩ አመራሮች ስግብግብነት የተበዘበዘ እንዲሁም መጣ በተባለው ለውጥ ተስፋ ያደረገ ቢሆንም አሁን የተዘጋጀው መዋቅር እንዳሳዘናቸው ይገልጻል ይህም ብቻ ሳይሆን ሀገሪቱ በኮሮና ቫይረስ ምክንያት ችግር ውስጥ ወድቃ ነባር ሰራተኞችን እንደገና ፈትኖ ለመቅጠር ያቀደው እቅድ ተገቢ እንዳይደለም ያብራራል።

የኮርፖሬሽኑ ችግርና ለኪሳራ ሲዳርገው የቆየው አሁን ያለው የሰራተኛ ብዛት ሳይሆን የአመራር ድክመት በመሆኑ አካሄዱ እንዲስተካከልም ሰራተኞች በደብዳቤያቸው ጠይቀዋል የብረታ ብረትና ኢንጂነሪንግ ኮርፖሬሽን ያዘጋጀው የሰራተኛ ፍላጎት መዋቅር ለዋና መስሪያ ቤቱ እና በስሩ ላሉ ዘጠኝ ፋብሪካዎች ለእያንዳንዳቸው በተናጠል የሰራተኛ ፍላጎት መዋቅር አስጠንቷል።

የተወሰኑት የኮርፖሬሽኑን የሰራተኛ ፍላጎት መዋቅር ጥናቶች እንደሚያመለክቱት ለአብነትም በኢንዱስትሪ ፓርኮች ልማት ኮርፖሬሽን የኢንዱስትሪ ፕሮጀክቶች አገልግሎት የተሰራው ባለ 85 ገጽ የሜቴክ ዋና መስሪያ ቤት የተጠናቀቀ የሰራተኛ ፍላጎት መዋቅር የተጠናቀቀ ሪፖርት ፣ በብረታ ብረትና ኢንጂነሪንግ ኮርፖሬሽን ዋና መስሪያ ቤት አሁን ላይ ያሉ የሰራተኞች ብዛት 803 ሲሆን በአዲሱ መዋቅር መሰረት ግን ለሜቴክ ዋና መስሪያ ቤት የሚያስፈልገው ሰራተኛ 412 ብቻ መሆኑን ያነሳል።

በጥናቱ ትርፍ ሆነው የተገኙት 391 የዋናው መስሪያ ቤት ሰራተኞች ላይ መንግስት ውሳኔን እንዲያሳልፍ ምክረ ሀሳብ አቅርቧል የመዋቅር ጥናቱ የስራ ሂደት መንዛዛትን መቀነስና ውጤታማነት ማምጣትን ለዚህ መነሻነት አቅርቧል በኮርፖሬሽኑ ስር ያሉ የዘጠኝ ፋብሪካ ሰራተኞችም ተመሳሳይ እጣ ፈንታ እንደሚገጥማቸው ተሰምቷል፡፡አሁን ላይ በኮርፖሬሽኑ ስር ያሉ አዳማ የግብርና ማሽነሪ ማምረቻ ፣ፓወር ኢኪውፕመንት ማምረቻ ፣ ቢሸፍቱ አውቶሞቲቭ ፣ አቃቂ ቤዚክ ሜታል ፣የብረታ ብረት ፋብሪኬሽንን ጨምሮ የዘጠኝ የኮርፖሬሽኑ ፋብሪካዎች ሰራተኞች በግማሽና ከግማሽ በላይ በአዲሱ መዋቅር ከስራ ውጭ ሊሆኑ እንደሚችሉ ይጠበቃል።

ቢሸፍቱ አውቶ ሞቲቭ ፋብሪካ አሁን ላይ ሶስት ሺህ ሰራተኞች ያሉት ሲሆን በአዲሱ የሰራተኞች አደረጃጀት የሚያስፈልገው አንድ ሺህ ብቻ በመሆኑ ሁለት ሺህ ሰራተኞቹ ከመዋቅሩ ውጭ ይሆናሉ በፋብሪካው ውስጥ ያሉ ሰራተኞች እስካሁን ደሞዝ የሚከፈላቸው ይሁን እንጂ የተጠናቀቀው አዲሱ መዋቅር ሲተገበር ከስራ ውጭ የመሆን እድላቸው ሰፊ ነው አቃቂ ያለው ቤዚክ ሜታል ፋብሪካም ለወራት ብዙ ሰራተኞችን ከስራ ውጭ አድርጎ ደሞዝ እየከፈለ የቀየ ሲሆን አዲሱ መዋቅር ተግባራዊ ሲሆን እጣ ፈንታቸው ይለያል ተብሏል ስትል ዋዜማ ዘግባለች።