አባይ ሚዲያ ሰኔ 10፤2012

ግብፅ የዓባይ ውኃን በተመለከተ የምታራምደው ግትር አቋም፣ በቅርቡ ለተጀመረው የሦስቱ አገሮች ድርድር እንቅፋት መሆኑን መንግሥት አስታውቋል የውጭ ጉዳይ ሚኒስትሩ አቶ ገዱ አንዳርጋቸው ትላንት አመሻሽ ላይ እንዳሉት፣ አምስተኛ ቀኑን ይዞ በነበረው የሦስትዮሽ ድርድር ግብፅ የራሷን ብቻ ጥቅም ለማስጠበቅ የያዘችው ግትር አቋም ድርድሩን እየተፈታተነ ነው፡፡

ግብፅ በተጀመረው ድርድር ሁለት አካሄዶችን ይዛ ቀርባለች ያሉት አቶ ገዱ፣ አንድ እግሯን ወደ ድርድሩ አንዱን እግሯን ደግሞ ወደ የተባበሩት መንግሥታት ድርጅት የፀጥታው ምክር ቤት በማድረግ ነው የቀረበችው ብለዋል ‹‹በድርድሩ ግብፆች የፈለጉትና የጠየቁት ሁሉ እንዲሰጣቸው ይፈልጋሉ፣ የሚሰጡት ግን የላቸውም፤›› ካሉ በኋላ፣ የጋራ ስምምነት ላይ ሳይደረስ ኢትዮጵያ የግድቡን የውኃ ሙሌት መጀመር አትችልም በማለት ተቀባይነት የሌለው ሐሳባቸውን ቀጥለዋል ሲሉ የግብፅን አቋም ነቅፈዋል፡፡

ዳግም በተጀመረው ታላቁ የህዳሴ ግድብ ድርድር የመጀመርያ ዙር የውኃ ሙሌትና አስተዳደር ላይ በኢትዮጵያ፣ በግብፅና በሱዳን መካከል መሠረታዊ መግባባት መፈጠሩን ኢትዮጵያ የውኃ፣ መስኖና ኢነርጂ ሚኒስቴር አስታውቆ ነበር የመጀመርያው ምዕራፍ የውኃ ሙሌት ለማከናወን በሚያስችሉ መርሆችና መመርያዎች ላይ፣ በሦስቱ ወገኖች ተደራዳሪዎች መካከል መግባባት መፈጠሩን ቢገልጽም፣ የግብፅ አቋም ችግር እየፈጠረ እንደሆነ ነው የተብራራው፡፡

የውኃ፣ መስኖና ኢነርጂ ሚኒስቴር መግለጫ ከቀናት በፊት ከድርድሩ የተገለጹ መልካም ውጤቶችን ቢያስታውቅም፣ የግብፅ መንግሥት ከፍተኛ አመራሮች ግን በአሁኑ ወቅት እየተካሄደ በሚገኘው ድርድር ተስፋ እንደሌላቸው እየገለጹ ነው ስለድርድሩ አሉታዊ መረጃዎችን እያወጡ ከሚገኙ የግብፅ ከፍተኛ አመራሮች መካከል የውጭ ጉዳይ ሚኒስትሩና የግብርና ሚኒስትሩ በዋነኛነት ተጠቃሽ ናቸው።

የውጭ ጉዳይ ሚኒስትሩ ሳሜህ ሽኩሪህ ሰኞ ሰኔ 8 ቀን 2012 ዓ.ም. በተካሄደው የግብፅ ንግድ ምክር ቤት ዓለም አቀፍ ትብብር ጉባዔ ላይ ባደረጉት ንግግር፣ ህዳሴ ግድቡን አስመልክቶ ሰሞኑን እየተካሄደ ባለው ድርድር ላይ ግብፅ ተስፋ እንደሌላት ገልጸዋል በመሆኑም የተሟላ ስምምነት ሳይደረስ የግድቡ የመጀመርያ ምዕራፍ ሙሌት ለመጀመር ኢትዮጵያ መወሰኗ የግብፅን ጥቅም የሚጎዳ ስለሆነ፣ ግብፅ ሰላም ለማስፈን ያለባትን ኃላፊነት ለመወጣት ለሁለተኛ ጊዜ አቤቱታዋን ለተባበሩት መንግሥታት ድርጅት (ተመድ) የፀጥታው ምክር ቤት እንደምታስገባ አስታውቀዋል።

ኢትዮጵያ ባለፈው ሳምንት ባወጣችው መግለጫ ግብፅ በአንድ ወገን በድርድሩ ለመሳተፍ፣ በሌላ በኩል ደግሞ ወደ ፀጥታው ምክር ቤት ለመሄድ መወላወሏን አቁማ የልዩነት ምንጭ የሆነውን የቴክኒክ ጉዳይ በሦስትዮሽ የቴክኒክ ድርድር እንድትፈታ ማሳሰቧ ይታወሳል ይህንን ድርድር አሜሪካ፣ የአውሮፓ ኅብረትና አፍሪካን በመወከል ደግሞ የወቅቱ የአፍሪካ ኅብረት ሊቀመንበር የሆነችው ደቡብ አፍሪካ በታዛቢነት እየተከታተሉት ነው።