አባይ ሚዲያ ሰኔ 16፤2012

የአማራ ብሔራዊ ንቅናቄ የፌዴሬሽን ምክር ቤት ምርጫው የኮሮና ቫይረስ ስጋት መሆኑ ካቆመ ከዘጠኝ ወር በኋላ ይከናወናል ሲል ያሳለፈውን ውሳኔ እንደሚቀበለውና በህግ መንገድ እንደተካሄደ እንደሚያምን ገልጿል የንቅናቄው ምክትል ሊቀ መንበር አቶ የሱፍ ኢብራሂም እንደተናገሩት “የአማራ ህዝብ ግዛቶች በነበሩትና በትግራይ ክልል አስተዳደር በማን አለብኝነት ያለአገባብ በተወሰዱት አካባቢዎች ማለትም በወልቃይት፣ በሁመራ፣ በራያ፣ በጠገዴ፣ በጠለምት እና በመሳሰሉት አካባቢዎች ምርጫ እንደምንወዳደር በማኒፌስቷችን አስቀምጠናል” ብለዋል።

የትግራይ ክልል ምርጫ እንደሚያደርግ ማስታወቁን ተከትሎ በነዚህ ግዛቶች አሁን ሊደረግ የታቀደው ምርጫ እንዲታገድልን ለመጠየቅ ተዘጋጅተናል ብለዋል በመሰረቱ የትግራይ ክልል የጀመረው የምርጫ እንቅስቃሴ ህገ መንግስታዊ እንዳልሆነ ቢታወቅም እኛ በተለይ ልንወዳደርባቸው የነበሩት ቦታዎች ላይ ምርጫው እንዳይደረግ እገዳ እንጠይቃለን ሲሉ ተናግረዋል፡፡

“አንደኛ በማንኛውም በትግራይ ክልልና በፌደራል መንግስቱ መካከል ባለው የፖለቲካ ግንኙነት፤ በህወሀት መሩ ኢህአዴግ ማን አለብኝነት አማራን በመበደል ግዛቶቹ ተወስደው የተጠቃለሉበት ሂደት የድርድር አካል እንዲሆን አንፈልግም” ሲሉ ተናግረዋል እነዚህ አካባቢዎች “የመታያያ ፣ የጉቦ፣ ያንን ግዛት ሰጥቶ ሌላ ነገር የማግኛ የፖለቲካ መደራደሪያ እንዲያደርጉት እንደማንፈቅድ የትግራይ ክልል አስተዳደርም ፌደራል መንግስትም ሁለቱም አካላት እንዲያውቁት እንፈልጋለን” ብለዋል፡፡

“የፌደራል መንግስት ሲሆን ቶሎ የትግራይ ክልላዊ መንግስትን ህገ ወጥ እቅስቃሴ ማስቆም ነበረበት” ያሉ ሲሆን “የፌደራል መንግስት መሽኮርመሙን ማቆም አለበት፤ ህጉ የሚፈቅድለትንም እርምጃ መውሰድ አለበት” ሲሉም ተናግረዋል በትግራይ ክልል በርካታ ሰብአዊ ጥቃቶች እየተፈጸሙ ነው፤ ከጊዜ ወደ ጊዜ እየባሰ ነው፤ በፌደራል መንግስት የማስቆም ስራም እየተሰራ አይደለም ፤ ብለዋል አቶ የሡፍ፡፡

ብልፅግና ከህወሀት ጋር ፍቺ እንኳን በቅርቡ እንዳከናወነ ያነሱት አቶ የሱፍ “ከዚህ ቀደም ጅምላ ግድያውንና ፣ማፈናቀሉን አይቶ እንዳላየ በማለፍ ሽፋን እንደሰጠው ሁሉ አሁንም ራቁት የወጣ የመብት ጥሰቱን ቁጭ ብሎ እንደታዛቢ ሆኖ ካለፈ በወሬ ደረጃ የሚለፈፈው ፣የኢትዮጵያ ቀጣይነትና ብልፅግና በርግጥ አሁን ነው አደጋ ላይ የሚወድቀው” ሲሉ ተናግረዋል፡፡

መቋጫ በሌለው ተአቅቦ ዜጎች የማይተካ ዋጋ እየከፈሉ አይደለም ሀገረ መንግስትን የሚያረጋግጠው ያሉት አቶ የሱፍ የፌደራል መንግስት ብቻዬን ነኝ አይነት የተጋነነ የመነጠል ስሜት ካለው ከጎኑ ነን በሀገር ጉዳይ ድርድር የለንም፤ ቀላል ሀይል አይደለም ከጎኑ ያለው ፤ እንኳን እኛና የትግራይ ህዝብም ከጎኑ ነው ሲሉ አቶ የሱፍ አስረድተዋል፡፡