አባይ ሚዲያ ሰኔ 17፤2012

የአረብ ሊግ አባል ሀገራት ውጭ ጉዳይ ሚኒስትሮች ኢትዮጵያ ግድቡን በተመለከተ ብቸኛ እርምጃ ወይንም ያለስምምነት የውኃ ሙሌት እንዳትጀምር ጥሪ አቅርበዋል የውጭ ጉዳይ ሚኒስትሮቹ ይህን ያሉት በትናንትናው እለት በቪዲዮ ኮንፈረንስ አማካኝነት ስብሰባ ካደረጉ በኃላ ባወጡት የጋራ የአቋም መግለጫ ነው ሊጉ ባለፈው የካቲት ወር አካሂዶት በነበረው ስብስባ ግብጽ ያቀረበችውን ኢትዮጵያን የሚቃወምና ግብጽ በናይል ውሃ ላይ ያላትን “ታሪካዊ መብት” የሚገልጽን የውሳኔ ሀሳብ አጽድቆ ነበር፡፡

በጊዜው ሁሉም የሊጉ አባል ሀገራት የውሳኔ ሀሳቡን ሲደግፉ፣ ሱዳን በግልጽ ተቃውማው እንደነበር ይታወሳል ኢትዮጵያ፣ ሱዳንና ግብጽ በቅን መንፈስ ወደ ውይይቱ እንዲመለሱና ተጨማሪ ጥረት እንዲያደርጉ ሚኒስትሮቹ በአቋም መግለጫቸው አስታውቀዋል የድርድሩ መቋረጥ አሳስቦናል ያሉት ሚኒስትሮቹ ሶስቱም ሀገራት ከአመታት በፊት በካርቱም በፈረሙት የ“መርሆች ስምምነት” መሰረት አንዱ ሀገር በሌላኛው ላይ የጎላ ተጽእኖ በማያሳድርበት አግባብ ለስምምነቱ ተገዢ መሆን እንደሚገባቸው ገልጸዋል፡፡

በስብሰባው ላይ ጅቡቲ፣ሶማሊያና ኳታር ግድቡን በሚመለከት የቀረበውን የውሳኔ ሀሳብ መቃወማቸውን የተለያዩ ዘገባዎች ወጥተዋል ግብጽ በቅርቡ ለተባበሩት መንግስታት ድርጅት የጸጥታው ምክርቤት በጻፈችው ደብዳቤ ግድቡ ለአለምአቀፍ ሰላምና ጸጥታ መደፍረስ ምክንያት እንዳይሆን ተመድ ጣልቃ መግባት እንደሚያስፈልገው ገልጻ ነበር የኢትዮጵያ ውጭ ጉዳይ ሚኒስትር ገዱ አንዳርጋቸው ግብጽ “‘በሀሰት የህዳሴው ግድብ ለአለም አቀፍ ሰላምና ደህንነት ስጋት ነው’” በማለት ለጸጥታው ምክርቤት የላከችው ደብዳቤ ትክክል አይደለም የሚል ይዘት ያለው ደብዳቤ ለምክርቤት አስገብተዋል፡፡

ከግድቡ ጋር በተያያዘ “የሰላምና ጸጥታ መደፍረስ ቢያጋጥም በዛቻና ጠብአጫሪ በሆነ ተግባር የተጠመደችው ግብጽ ኃላፊነቱን የምትወስድ” እንደምትሆን ሚኒስትር ገዱ አንዳርጋቸው ለተባበሩት መንግስታት ድርጅት በጻፉት ደብዳቤ መግለጻቸውን ዘግበን ነበር ኢትዮጵያ በተደጋጋሚ ግድቡ ለልማት የሚውል ፕሮጀክት መሆኑን በታችኞቹ ተፋሰስ ሀገራት የጎላ ጉዳት እንደማያደርስ እየገለጸች ሲሆን በአንጻሩ ግብጽ ከናይል የምታገኘው የውሃ መጠን “ይቀንስብኛል” በማለት ቅሬታ ስታሰማ ቆይታለች፡፡

ግብጽና ኢትዮጵያ ከፍተኛ ቅራኔ ውስጥ የገቡ ሲሆን ሱዳን በአንጻሩ መሀል ላይ ለመሆን እየሞከረች ትገኛለች ኢትዮጵያ በድርድሩ ስምምነት ላይ ተደረስም ፣አልተደረስም በመጭው ሀምሌ ወር የግድቡን የመጀመሪያ የውሃ ሙሌት ከመጀመር እቅዷ ፈቅ እንደማትል እየገለጸች ነው የኢትዮጵያን የውኃ ሙሌት እቅድ ግብጽና ሱዳን አይቀበሉትም፤ ስምምነት ላይ ሳይደረስ የዉኃ ሙሌት እቅድን አንቀበልም ብለዋል፡፡