አባይ ሚዲያ ሰኔ 22፤2012

በኢትዮጵያ  በዚህ ዓመት ማብቂያ ላይ ሊካሄድ ታቅዶ የነበረው 6ኛው ሀገራዊ ምርጫ  በኮሮና ቫይረስ ወረርሽኝ ስጋት ምክንያት  ወደ ሌላ ጊዜ እንዲዘዋወር ቢወሰንም የትግራይ ክልል ግን ምርጫ ለማካሄድ እንደወሰነ ማሳወቁ ይታወሳል አገራዊ ምርጫው ወደ 2013 ዓ.ም ሲራዘም ተቃውሟቸውን ካሰሙ አካላት መካከል የትግራይ ክልል አንዱ ሲሆን በክልሉ ወቅቱን ጠብቆ ምርጫ ለማካሄድ መወሰኑን በማስታወቅ ለምርጫ ቦርድ ጥያቄ ማቅረቡም አይዘነጋም።

ብሔራዊ ምርጫ ቦርድ የክልሉን ጥያቄ ውድቅ ካደረገ በኋላ ብሔራዊ ምርጫ ቦርድ ትግራይ ክልል ለማካሄድ የጠየቀውን የክልላዊ ምርጫ ለማስፈጸም የሚያስችለው ሁኔታ የለም ቢልም፤ የትግራይ ክልል የሚያቋቁመው አካል ምርጫውን እንደሚያስፈጽም የክልሉ ፍትህ ቢሮ ኃላፊ አቶ አማኑኤል አሰፋ   ገልፀው ነበር።

በዚህም በክልሉ ለማካሄድ ዕቅድ ከተያዘለት ክልላዊ ምርጫ ጋር በተያያዘ ሁለት የሕግ ረቂቅ ሰነዶች ተዘጋጅተው ነገ ማክሰኞ በትግራይ ከሚንቀሳቀሱ ተቃዋሚ የፖለቲካ ድርጅቶች ጋር ለመወየያያት ቀጠሮ መያዙን ለማወቅ ተችሏል ከፖለቲካ ፓርቲዎች ጋር ምክክር ከሚደረግባቸው ረቂቅ ሰነዶች አንዱ የምርጫና የምርጫ ሥነምግባር ረቂቅ አዋጁ 130 አንቀጾችን የያዘ ነው ተብሏል።

ሁለተኛው ሰነድ ደግሞ የትግራይ ብሔራዊ ክልላዊ መንግሥት የምርጫ ኮሚሽን ለማቋቋም ለማደራጀት እንዲሁም ስልጣኑንና ተግባሩን ለመወሰን የተዘጋጀ ረቂቅ አዋጅ ነው ይህ አዋጅ 33 አንቀጾችን የያዘና 27 ገጾች ያሉት ሰነድ መሆኑንንም ለማወቅ ተችሏል ይህንንም ተከትሎ በትግራይ ክልል 6ኛው ምርጫ እንዲካሄድ በክልሉ የሚንቀሳቀሱ ሦስት የፖለቲካ ድርጅቶች ተሳታፊ የሚያደርጋቸው የጋራ ምክር ቤትና የምርጫ ተቋም እንዲቋቋም ለክልሉ መንግሥት ጥያቄ አቅርበው ነበር ይህንን ተከትሎም ለምክክር የተጠሩት ፓርቲዎች ባይቶና፣ሳልሳይ ወያኔና ምናት የተባሉ በክልሉ የሚንቀሳቀሱ የፖለቲካ ፓርቲዎች መሆናቸውን አባይ ሚዲያ ከምንጮቹ ለማወቅ ችሏል፡፡

የክልሉ ምክር ቤትም የመስከረም ወር ከማብቃቱ ቀደም ብሎ ምርጫ እንዲካሄድ መወሰኑ ይታወሳል።ነገር ግን የትግራይ ክልል እከውነዋለሁ እያለ ያለው ክልላዊ ምርጫ ከፌደራል መንግስትና ከምርጫ ቦርድ እውቅና ውጪ በመሆኑ አግባብነት እንደሌለው የህግና የህገ መንግስት ምሁራን በተደጋጋሚ ሲገልጹ ተስተውሏል ምሁራኑ ክልላዊ ምርጫው ህገ መንግስቱን ያላከበረ መሆኑን ገልጸው አለም አቀፍ ወረርሽኝ በተከሰተበት ወቅት ምርጫ ማካሄድ የህዝብን ጤና ስጋት ውስጥ መክተት መሆኑንም ተናግረዋል፡፡