አባይ ሚዲያ ሃምሌ 08፤2012

የድምፃዊ ሃጫሉ ድንገተኛ ግድያ ከተፈጸመ በኋላ በኦሮሚያ ክልል የተለያዩ አካባቢዎች ባልጠበቁትና ባላሰቡት ሰዓት በደረሰባቸው ጥቃት የቤተሰቦቻቸውን አባላት በሞት የተነጠቁና ንብረታቸው የወደመባቸው ግለሰቦች፣ ሕዝብና መንግሥት በፍጥነት ካልደረሱላቸው ጎዳና ላይ ወድቀው እንደሚቀሩ በመግለጽ ጥሪ አቅርበዋል፡፡

አባይ ሚዲያ ያነጋገራቸው እነዚህ ዜጎች  እስካሁን ያሉትም ግለሰቦች በሚያደርጉላቸው ድጋፍ መሆኑን ገልጸዋል በሻሸመኔ ከተማ መኖሪያ ቤቶች፣ የሸቀጣ ሸቀጥ መደብሮች፣ ሆቴሎችና የተለያዩ ተሽከርካሪዎች የተቃጠሉባቸው ሰዎች እንደገለጹት፣ ለበርካታ ዓመታት ያፈሩዋቸው ንብረቶች እንዳሉ ወድመዋል፡፡

በአሁኑ ጊዜም ከለበሷቸው አልባሳት በስተቀር ምንም ነገር ስለሌላቸው ድጋፍ እንዲደረግላቸው ጥያቄ አቅርበዋል ብዙዎቹ በንግድ ሥራ ላይ የተሰማሩ በመሆናቸውና የሚያገኙት ገንዘብም እዚያው በዚያው የሚገላበጥና በሥራ ላይ ስለሆነ፣ በባንክ ሒሳባቸው ውስጥ እዚህ ግባ የሚባል ገንዘብ ስለሌላቸው መልሰው ለመቋቋም እንደሚቸገሩ ተናግረዋል፡፡

በዝዋይ (ባቱ) እና በአርሲ ነገሌ ከተሞች ውስጥ ንብረቶቻቸው የወደሙባቸው ሰዎችም በበኩላቸው ምንም የቀራቸው ነገር ስለሌለ፣ እነሱም የሕዝብና የመንግሥት ድጋፍ ካልተደረገላቸው መልሰው ማገገም እንደማይችሉ ነው የተናገሩት በሻሸመኔ፣ በዝዋይና በአርሲ ነገሌ ከተሞች በተለያዩ ሥፍራዎች በጊዜያዊነት ተጠልለው የሕዝብና የመንግሥትን ምላሽ የሚጠብቁት እነዚህ ወገኖች፣ ወቅቱ ክረምት እንደ መሆኑ መጠን አፋጣኝ ድጋፍ እንሻለንም ብለዋል፡፡

ከማክሰኞ ሰኔ 23 ቀን 2102 ዓ.ም. ንጋት ጀምሮ በሦስቱም ከተሞች በተቀራራቢ ሰዓት በተፈጸሙ ጥቃቶች በርካቶች ሲገደሉ፣ ከፍተኛ የሆነ ሀብት ወድሟል መኖሪያ ቤቶች፣ ሆቴሎች፣ የንግድ መደብሮች፣ ሕንፃዎች፣ የአበባ እርሻዎችና ተሽከርካሪዎች ተቃጥለዋል፡፡ የመንግሥት ተቋማትም በቃጠሎ ወድመዋል በባሌና በአርሲ ዞኖች በተፈጸሙ ጥቃቶችም በርካቶች ተገድለው ከፍተኛ ንብረት ሲወድም፣ ክሊኒኮችና ጤና ጣቢያዎችን ጨምሮ የመንግሥት ተቋማት ሙሉ ለሙሉ ወድመዋል፡፡

በባሌ ዞን በአጋርፋ ወረዳ ውስጥ መኖሪያ ቤቶች፣ ሆቴሎች፣ ጤና ጣቢያዎችና የመንግሥት አገልግሎት መስጫ ተቋማት ሲወድሙ፣ በአርሲ ዞን ገደብ አሳሳ ከተማ ተመሳሳይ ውድመት መድረሱ ታውቋል፡፡ የንብረቶቹ ባለቤቶችም ባዶ እጃቸውን ቀርተው የመንግሥትን ድጋፍ እየተጠባበቁ መሆኑን ነው ለአባይ ሚዲያ የተናገሩት በመዲናዋየንግድ መደብሮች፣ ሆቴሎችና የባንክ ቅርንጫፎች ጥቃት የተፈጸመባቸው ሲሆን፣ ከ250 በላይ ተሽከርካሪዎች መሰባበራቸው ይታወሳል የጉዳቱ መጠን ምን ያህል እንደሆነ በውል ባይታወቅም፣ በሚሊዮን ብሮች እንደሚገመት ፖሊስ ለፍርድ ቤት ካቀረበው መረጃ ለማወቅ ተችሏል፡፡